一幅「港獨」關係圖
一幅「港獨」關係圖

中大學生會會長區倬僖噚日喺開學禮播「獨」,廣男噚日已經寫過佢話港人治港、高度自治係「港獨」嘅延伸,語出驚人,沒有最驚嚇,只有更驚嚇。原來區倬僖仲將國家講成「北方帝國殖民」,同港大《學苑》話香港被「內地殖民」如出一轍。其實區倬僖原來一直都係唔認自己係中國人,仲曾經幫「本土民主前線」、「青年新政」助選;而中大另一個播「獨」嘅新亞書院代表,據報直頭係戴耀廷嘅人。如果報道屬實,呢一幅政界、學界「港獨」人士有勾連嘅關係圖,實在清晰不過。

否認中國人身份的「港獨」客

對於區倬僖口出狂言,只要睇下佢嘅過去,就會覺得呢個學生代表「獨」得咁交關,其實係有跡可尋;有傳媒就揭發,區倬僖曾經接受訪問,宣稱香港、內地有文化差異同身份嘅唔同,仲直言自己唔認同中國人嘅身份;又喺選學生會嘅時候直認深受「本土」思潮浸淫,過去兩年為「本土民主前線」同「青年新政」助選,仲支持中大成立所謂嘅「香港獨立研究學會」。

至於中大新亞書院臨時會長孫昊賢,噚日亦繼區倬僖之後喺中大開學禮播「獨」,話「香港獨立」未去到傷害任何人,點解要當成「言論禁區」;呢個孫昊賢,除咗曾經力撐以「支那」辱罵內地生嘅周竪峰之外,據報佢仲係戴耀廷「風雲計劃」其中一個要推出嚟參選區議會嘅「生力軍」。中大學生、「本土民主前線」、「青年新政」與及戴耀廷一齊同「港獨」呢個關鍵詞出現,大家諗到啲乜?

政客、學生合流播「獨」

廣男就覺得,政客、教授以至學生合流,一齊喺政界、社區以至校園播「獨」,佢哋嘅「威力」真係一啲都唔可以睇小;喺傳播媒介面前政客或者政客學者身份難分嘅戴耀廷等人出盡火力,係咁話畀人聽「港獨」而家不可行,將來「或可行」,係咁叫人想像中國崩潰會點,為「港獨」做所謂「理論建構」工作;而喺校園裡面,一班同「港獨」政客關係千絲萬縷嘅學生就係咁喺校園宣揚「港獨,可以想像得到,假以時日「港獨」風氣散播到社會各階段,恐怕就唔係只係「杞人憂天」喇!

有傳媒報道,本港多間大學學生會,好多成員都係以「本土派」自居,有啲大學生代表就算無喺開學禮致辭,自己都喺學生會迎生刊物裡面提及「港獨」;另外亦有大專院校講明過一、兩日開學就會講「港獨」。以前大學學生會講愛國,我哋深感欣慰,而家佢哋不約而同地講要脫離自己國家,實在教人唏噓。

原圖:中大學生會Facebook

5
嬲爆
1
超無奈
1
唔係呀哇
1
驚訝
1
搞笑咩

評論