立法會九龍西補選將會喺今年11月舉行，雖然表面上建制以至盲反派都未確定由邊個參選，但盲反派將會由劉小麗「披甲上陣」、李卓人做「Plan B」已經可以話係呼之欲出。日前，李卓人接受傳媒訪問時，就話如果假定最後係由陳凱欣（高永文任食衛局局長時嘅政治助理）對佢，咁即係政府或者建制派「隨意DQ」人，咁會反映選舉唔公平性咁話。其實，如果有人擺明係違反《基本法》而可以參選，咁先係唔公平，況且盲反派班人而家「圍威喂」內定邊個參選，公平咩？

盲反派視法律如無物

盲反派之所以搵定李卓人做Plan B，多多少少都係因為「小麗民主教室」嘅劉小麗係「自決派」、即係搞「暗獨」嘅政客，最後有冇參選資格都未知；但係廣男想舉出一點，就係如果有人搞「自決」、「暗獨」，擺明就唔會效忠《基本法》同特區，點解政府一定要畀呢啲人參選呢？難道因為「選舉權」三個字，就可以畀「自決派」或者「港獨派」入立法會攞住公帑「反中亂港」咩？道理根本就係講唔通！

李卓人講開「公平」嘅問題，廣男覺得有個位盲反派真係非常之唔公平，九龍西之所以有立法會議席出缺，完全係因為劉小麗以至「青年新政」游蕙禎喺宣誓嘅時候玩嘢，搞到自己連議席都冇埋；對於廣男嚟講，劉小麗當初嘅行為等同「自動放棄」議席，而家又憑咩認為其他人都要讓路，一定要畀佢選先，仲要欽點埋李卓人做Plan B呢？

馮檢基最無辜？

喺呢件事上面，廣男就覺得盲反派老將馮檢基係最無辜嘅，之前立法會九龍西補選，馮檢基明明係初選機制選定嘅Plan B，結果畀班本土派逼到連Plan B都冇得做；而家馮檢基連「民協」都退出埋，盲反派人士似乎仲想步步進逼，斷佢再參選嘅後路。既然李卓人咁鍾意講「選舉權」，廣男要問佢一句，馮檢基都有「選舉權」架喎，如果馮檢基再參選，李卓人唔知會唔會本著民主精神，歡迎馮檢基在參選呢？如果唔會，好心就唔好成日將民主、「選舉權」掛喺口邊喇唔該！ 

原圖：Takungpao