自從盲反派喺幾年前提出「以法達義」嘅極危險概念之後，呢班人相繼「違法」，畀人告、定罪當然係意料中事啦；但當盲反派人士被告甚至定罪嘅時候，佢哋就會搬咗另一個詞語出嚟，叫做「政治檢控」。喺最近青年新政梁頌恆、游蕙禎因為非法集結罪成被判監四個月，又有外國政客話案件係「政治檢控」；囍雨真係想問下，係咪自稱民主派，就唔駛守法先？如果係嘅話，咁香港就真係唔係法治社會喇！

外國政客 胡說八道

今次為梁、游發聲嘅外國政客，就係香港人權組織「香港觀察」（Hong Kong Watch）主席羅哲斯（Benedict Rogers），據報佢話香港法律已經淪為恫嚇異見者嘅「政治手段」，而梁、游呢類「政治檢控」案件亦製造寒蟬效應，窒礙香港民主運動。囍雨只係想問羅哲斯一句，係咪爭取民主就可以為所欲為先？

羅哲斯作為一個英國政客，囍雨「深信」佢應該好明白喺法治社會底下，無論係爭取民主抑或有其他政治訴求，如果有政客違法，法治社會都唔可以因為佢係「民主衛士」嘅身份而作出優待，否則法治就會受到損害。今次梁、游夥同助理衝擊議會嘅非法集結案，衝擊過程中有幾個保安受傷，絕對唔係一句「我係議員」或者「我都係行使權利」就可以卸責。誠如案件裁判官所言，案件涉及暴力，判監係唯一選擇。

暴力也不可判監？

同理，英國前外交大臣聶偉敬（Malcolm Rifkind）話梁、游案件「輕微」，好難相信喺其他國家或者地方會被判監，囍雨都係果句，如果案件涉及暴力都可以話係輕微或者小事，咁唔通要有人受重傷甚至有更嚴重後果先叫「唔小事」？唔好玩啦！香港呢套法律系統，係沿襲至英國套《普通法》，對於犯咗咩案可以判罰幾重有晒清晰罰則，今次梁、游所犯下嘅「非法集結」罪可以被判以「年」計嘅監禁，而家判佢哋坐四星期監都唔可以？唔通所謂民主派、本土派犯咗法，法庭要當佢哋係VIP，畀個「折扣」佢哋，最好一律免監禁？呢啲根本就係外國政客盲撐梁、游嘅歪理！ 

原圖：Takungpao