政府請學生去海洋公園 盲反派「無限亂入」
政府請學生去海洋公園 盲反派「無限亂入」

財爺陳茂波發表今屆政府第一份《財政預算案》,惠民措施當中有一項係撥款發展教育旅遊項目,海洋公園亦會派一萬張飛畀啲中小學生去玩同考察;呢啲與民共享甚至係與學生同樂嘅措施,本來就無傷大雅嘅。

但係,盲反派為咗全方位攻擊預算案同陳茂波,就連呢啲小小嘅惠民措施都要鬧一餐,議會陣線立法會議毛孟靜批評陳茂波「唔派錢救濟香港人,去救濟海洋公園」,另一個出名盲反政府嘅網媒就列咗一炸海洋公園嘅董事出嚟,指佢哋同林鄭月娥關係密切,話林鄭咁做係「找數」政策。講到政府同海洋公園利益輸送咁,呢班人到底知唔知海洋公園係咩機構,同埋班董事係咩角色架?唔好喺度「無限亂入」喎!

董事無償無酬 「找數」指控無稽

話林鄭因為同海洋公園班董事「有關係」,所以要間接派錢畀海洋公園,但寫呢啲所謂「報道」嘅網媒,有冇搞清楚海洋公園同佢哋啲董事係咩角色呢?海洋公園作為一個根據法例註冊成立嘅法定機構,既可以話係一間公營機構,又係一間非牟利機構,而佢啲董事局入面嘅非執行成員都無報酬或者酬金收。海洋公園係非牟利機構,而好多董事都無報酬收,有咩因由要用「政策」找數,某網媒係咪想老屈先?

至於毛孟靜話陳茂波「唔派錢救濟香港人,去救濟海洋公園」,毛孟靜有冇搞清楚,陳茂波用咗500幾億派糖,包括綜緩、生果金、長生津等有更多津貼,有需要學生又有一次過現金津貼,呢啲唔係派錢?毛孟靜係咪唔理公帑點運用,一定要政府全民派錢先?

無視公園歷年保育努力

仲有,毛孟靜話派海洋公園飛令到好多動物權益倡議者憤怒,講到海洋公園剝削啲動物咁,唔通開動物園就等於剝削動物?事實上,海洋公園喺保育方面都出咗唔少力,既曾經被外國機構頒發「人道保育」嘅認證,又成立保育基金拯救瀕危嘅哺亂類動物。

其實,今次搞教育旅遊、買飛畀啲學生去海洋公園,都係政府支持海洋公園做好教育甚至保育工作,而海洋公園作為公營機構、「香港人嘅公園」,政府支持佢或者注資又有咩問題呢?有啲盲反派政客、媒體喺度上綱上線,唔係連香港人同海洋公園之間嘅感情、關係都要離間呀?為咗盲反政府,真係去得好盡下喎! 

原圖:文匯報

評論