最遺憾的 就是仍未「走出去」
最遺憾的 就是仍未「走出去」

作為國際大都會,成日聽到有人話嚟香港「搵機會」,唔知係唔係因為咁,令到唔少香港青年從來冇出外發展嘅念頭。喺廣男讀書年代,屋企唔係太富有,根本冇乜「走出去」嘅機會;時移勢易,而家啲青年越嚟越多機會向外發展,廣男咁啱今日睇新聞見到有個「一帶一路國際合作香港中心」有個青年發展計劃,搵到人贊助成千萬畀啲學生到「一帶一路」特別係亞洲、中東等國家遊學、深度交流,廣男真係想問,點解喺我讀書果個年代冇呢啲機會架 …?

 

第一次坐飛機就是參加交流

 

說來慚愧,廣男第一次搭飛機嘅時候已經係廿歲嘅事,當年能夠坐飛機去其他地方,都係因為有社福機構搞咗個去北京嘅交流團,廣男於是有幸參加到交流團「第一次飛」,當時去探訪喺北京老人院住嘅長者,以及探訪一啲孤兒等等。而家諗返轉頭,香港人真係過得太幸福,物質生活總體嚟講都係豐富,亦因此令到年輕人永遠唔會諗離開自己居住地去工作、向外闖。

 

所以,當廣男見到青年有機會免費到其他國家遊學、深度交流,就覺得時下青年特別幸福,因為佢哋如果喺其他國家搵到發展機會,甚至可以真真正正「走出去」,喺外國嘗試闖出一片天。促成呢個青年發展、深度交流嘅梁振英話,呢個計劃有別於一般嘅遊學計劃,重點係考察華商嘅經營、工作同生活情況,等港青可以將「一帶一路」沿線發展中國家嘅事業發展、機遇納入生涯規劃,仲話參加學生唔一定要有考試能力,只要有進取心同辦事能力就可以。


提供更多選擇給青年 何樂而不為?


廣男覺得,對學生而言,無論讀書叻唔叻都好,多個機會見識世界點都係好事。今日香港年輕人成日將「有得揀」放喺口邊,但點解當大家其實「有得揀」嘅時候,啲年輕人又咁抗拒呢?冇話要特登做衰香港等大家被迫出外謀生喎,真係唔係,廣男相信中央同特區政府都唔會想香港衰,但大家撫心自問,香港市場真係太細喇,就算上屆梁振英政府肯大力開拓創新科技產業,都唔可以滿足所有年輕人需要架,咁其他受惠唔到嘅後生仔又點呢?唔通大家真係唔想向上流動咩?廣男唔信囉!


明白嘅,呢個世界總有人會認為,叫學生去其他國家發展,尤其係發展中國家搵機遇,好似就係「趕佢哋離開香港」咁。但講真吖,喺全球一體化嘅情況下,香港青年作為成長於國際城市嘅一份子,本來就應該懷有「闖天下」嘅準備,成績好、讀書好嘅學生,可以去外國發展;成績唔好或者對學業興趣唔大嘅學生,出面嘅世界一樣可以係佢哋發展嘅舞台。廣男自己最遺憾嘅,唔係小時候讀書讀得唔夠好,而係到目前為止,都未出去深度了解過其他國家;如果有一個平行時空而廣男亦已經「走出去」,唔知而家會唔會有更好發展呢?


原圖:港人講地

評論