「出得嚟行，預咗要還」，大部份香港人就算唔知來源，都肯定聽過吓呢句對白。但聽過，又唔代表明白箇中意義喎，呢呢呢，就好似港獨自決組織「香港眾志」咁吖，佢班核心成員相信個個都聽過呢句對白，但聽過，唔代表佢哋認同喎，好似近排香港警察依法檢控涉嫌違法嘅示威者咁，「香港眾志」就擺明唔知乜叫「承擔罪責」喇，有事冇事都將責任推晒落「政治」兩個字上，明顯係誤導公眾、曲解「法治」，一個咁冇承擔、做得出又唔敢認嘅政黨，囍雨真心唔buy囉！

警方做法合乎標準

繼呢個組織嘅核心成員林淳軒因為去年參加「佔領西環」違法行動被警方拘捕，尋日對住記者大發謬論後，「香港眾志」秘書長黃之鋒今日亦走到電台亂吹一番，佢話喎，「佔領西環」示威者有幾千人，但警方只係拘捕當中九個，認為政府要向外發放乜嘢訊息係「顯而易見」喎。

對於咁無知嘅言論，識笑真係好好笑。對於大型違法活動，執法部門基於人手、資源、對社會影響嘅評估等等，冇辦法拘捕同檢控晒「所有」參加者，呢個係客觀現實，即使係黃之鋒本人好嚮往嘅美國都好，出現呢啲大型違法示威活動，亦可見到可以「全部」檢控晒所有參加者，呢個根本就係正常過正常嘅情況，正常人根本唔會覺得有咩「訊息」可言。

唯一訊息：警告違法者

再者，檢控大型違法活動嘅領頭人物，藉以阻嚇其他意圖繼續破壞社會安寧者再次做啲違法行動，呢個亦係世界各地檢控部門嘅一貫做法，關咩要釋出「訊息」呢？如果話有「訊息」要釋出，咪就係唔想其他人效法呢班人咁去做埋啲破壞社會安寧嘅事囉，乜好唔尋常、好難明白咩？

不過算啦，講到底黃之鋒同佢班黨羽都係「敢做唔敢認」啫，好似喎，呢類針對涉嫌違法示威者嘅個案，係「政治檢控」，質疑係唔係可以促成社會和諧同修補撕裂咁話。

黃之鋒要求「政治介入檢控」

老實講吖，檢控涉嫌違法嘅人，當然唔係希望同班疑犯「搞和諧」啦，社會大眾亦唔係咁諗架喎；市民希望嘅，其實只係社會上持不同政治立場，但係冇犯法嘅人，大家之間嘅關係可以修補，以及變得和諧一啲，係咁多架咋，冇人要求過政府因為政治理由而去「放生」違法者喎！

根據黃之鋒邏輯，唔理佢同佢班黨羽做咗幾多違法事件，只要係出於「政治」理由，政府都唔可以檢控，否則就係「政治檢控」。囍雨真心唔明，如果政府為和諧而和諧，明知你有犯法都唔去檢控，乜咁樣唔係「政治介入檢控」咩？咁香港法治咪蕩然無存囉？黃之鋒等人口口聲聲尊重「法治」，乜原來由頭到尾都係「搬龍門」架？乜你班人咁架，好羞家囉，SO SAD！

圖片來源：香港電台即時新聞