梁國雄、羅冠聰、姚松炎同劉小麗因為「懷疑」拒絕／忽略誓言，違反《基本法》同《宣誓及聲明條例》而被政府入稟要求取消議員資格，違法佔領行動發起人陳健民搞咗個「守護公義基金」，幫呢四個議員籌款。陳健民日前接受訪問，仲質疑點解立法會唔畀錢呢四個議員打官司；大哥，佢哋四個涉嫌違例在先，仲想立法會用公帑幫佢哋畀錢，會唔會有啲過份先？你有冇考慮我哋納稅人嘅感受呢？

議員應為自己行為負責

其實陳健民係咪博大家唔記得呢？但囍雨記得好清楚，之所以會出現今次嘅司法覆核案，唔係四個議員無啦啦畀人告，或因議員工作而惹上官非；事實係，佢哋四個喺宣誓嘅時候以唔同嘅方式「玩嘢」，包括有「龜速」宣誓事後仲聲稱誓詞虛妄嘅劉小麗，有將誓詞變調疑似將陳述變成疑問句嘅羅冠聰，有喺誓詞中間加料嘅姚松炎，仲有攞起「結束一黨專政」道具嚟宣誓嘅梁國雄。幾個議員如果唔係「玩嘢」在先，又點會有之後嘅司法覆核案呢？

宣誓唔係單純形式咁簡單，而係一個表達效忠特區、擁護「一國兩制」同《基本法》嘅儀式，有實質法律效力，受到《基本法》第104條同埋《宣誓及聲明條例》第21條等約束，而家幾個議員懷疑違反咗相關法例，佢哋好應該為自己嘅言行負責，如果立法會用公帑畀佢哋打官司，補貼佢哋咪變咗佢哋「玩嘢」，市民埋單？！

絕不能用公帑幫助四議員

誠如立法會議員李慧琼所講，議員應該為自己行為負責，如果有人涉嫌違法要立法會幫佢找數，咪即係變相鼓勵啲人唔理法例啫。所以，議員「玩嘢」，要立法會用公帑、即係市民嘅錢幫佢哋找數，實在係唔公平。另外，筆者亦唔同意陳健民話政府用官司打擊「反對派」嘅講法，希望陳健民搞清楚，有人違法，政府就要執法，講開又講陳健民仲未為違法「佔中」「找數」，雖然時辰未到，但佢唔好以為民主派人士係可以無視法律，Okay？！

原圖：rthk