今屆特首選舉，大家不時會聽到有候選人話要「團結」、「和諧」或者「修補撕裂」等等，講到好有Heart令到社會和諧啲咁，不過係唔係咁容易呢，囍雨就好有保留喇！就算嗰個候選人真係咁諗，但佢班粉絲唔想咁呢！好似擺到明支明曾俊華同胡國興兩位候選人嘅Facebook專頁「前線科技人員」咁，竟然起晒提名林鄭月娥嘅選委底，個專頁啲粉絲就全部自動對號入座，話會向政府舉報唔同部門舉報呢班選委營運嘅店舖，仲有啲話會因為政治立場唔再去光顧呢班選舉嘅店舖添！咁樣「兇」人法，唔知算唔算「白色恐怖」呢？又算唔算用不正常手法干預選委投票意向呢？   言論過火或觸犯刑事罪行   到底「前線科技人員」講咗咩呀？冇乜特別，佢近日喺Facebook發帖，話「為咗表揚一眾提名林鄭選特首嘅商界選委，我哋會逐一介紹佢地，假如林鄭成功當選嘅話，大家一定要幫襯佢哋多D，以表揚佢哋嘅貢獻」。喺呢類專頁出得帖，班激進網民就識留言架啦，一時話得閒去啲選委嘅店舖「兜兩個圈」，睇下有乜嘢需要通知食環、消防等部門；一時又話以後唔幫襯等等。   講真，提名林鄭嘅商界同飲食界選委，唔少都有做零售，打開門口做生意，做怕呢班激進網民搗亂，大佬，分分鐘都交緊租架。講到底，呢班人都係想用顧客唔光顧嘅壓力，去令到班選委改變投票立場啫，你哋係顧客，當然有權唔光顧啦，但講到出口，仲語帶恐嚇，咁就唔同講法喇。   留咗言嘅人，小心啲喎，因為大家可能唔覺意觸犯《選舉（舞弊及非法行為）條例》，即係用武力或脅迫手段，誘使他人投票或唔投票畀某候選人，呢個行動係違法架！都係嗰句，唔幫襯、唔光顧，擺喺心囉，但如果你哋因為選委投票取向，而去散播呢啲言論，咁就唔係咁講法喇。   聲稱支持民主　言行卻破壞民主   老老實實，呢班人成日自稱支持「民主」，又成日強調民主、自由同法治等核心價值，但所作所為偏偏違背核心價值，言行可能仲要觸犯刑事罪行。如果佢哋覺得用呢啲手段可以脅迫到選委唔投票畀某人，咁呢啲人又有咩資格講民主呢？如果手執「民主招牌」就可以為何欲為，香港又會變成點呢？   圖片來源：前線科技人員FB截圖