有超過300個特首選舉選委嘅「民主300+」日前開會，一致通過按照民間全民投票（下稱「民投」）結果去投票，會將選委票集中支持「民望最高」嘅特首候選人。就咁聽落去，「民主300+」做法好似好民主，但「魔鬼在細節」，有啲地方好似為某候選人度身訂造咁嘅？唔通「民主300+」想操控選舉？非建制派今時今日先話「睇民意」，查實如果前年政改通過咗，我哋又有冇需要靠「民主300+」幫我哋投票呢？

民間全民投票「魔鬼在細節」

表面睇落去，「民主300+」跟「民投」選特首，好似好符合「民主」原則咁，不過睇真啲，點解所謂民望嘅計算方法，好似咁古怪嘅？一般嚟講，民望就梗係計算邊個候選人最多人支持啦，但呢個由「違法佔領」搞手戴耀廷搞嘅「民投」，民望計算方法竟然唔係計邊個最多人支持，而係以「支持率」扣除「反對率」嘅「支持率淨值」計算。今日就有報章專欄指出，用咁嘅方法計算民望，客觀效果就係確保某名候選人「眾望所歸」勝出，等民主派「All In」選票畀佢！

仲有，另一個令囍雨深信佢哋唔會正經搞投票嘅原因係，「民主300+」召集人、公民黨郭榮鏗竟然喺電台話，「民投」系統有技術問題要處理，可能有黑客活動影響結果；郭榮鏗咁講法，如果「民投」結果唔啱心水，會唔會到時有人話投票系統畀黑客入侵，結果無效而叫啲選委「按原則」投票架？囍雨認為，戴耀廷同非建制派挖空心思，不惜加入大量條件去「製造民意」，無非係想假借民意之名，操控選舉為實。

非建制派可置民意於不顧

不過咁，正所謂「認真就輸了」，囍雨覺得大家唔需要認真對待呢個「投票」。撇除非建制派可以有千萬種理由唔跟結果投票，大家唔好唔記得，當年政府推出政改方案，無論係政黨抑或民間研究組織所做民調，都證明長期有超過五成、最高有六成市民支持政改方案，但最後非建制派（當時叫「泛民主派」）都係聲稱「民意」未必是一切，有時「民意」之外，從政者都要堅守「自己原則」，故此否決政改方案囉。唓，你講晒啦！

講來講去，本來只要當日「袋咗先」，今日全港500萬市民可以「一人一票選特首」，根本唔使勞煩「民主300+」「代我哋」投票，更加唔需要透過一個多多限制嘅「民投」表達意見。否決普選時「唔睇民意」，自己有票投又聲稱「睇民意」，非建制派真係「好民主」囉！

不過咁，佢哋只係話「睇」民意啫，都冇話跟住做，都係嗰句：「認真便輸了」！

圖片來源：香港電台即時新聞