犯咗法嘅人，出言恐嚇執法機構同佢哋嘅直屬上司，要求停止調查，呢種係典型嘅《妨礙司法公正》罪行。結果，罪行被揭發，犯法嘅人聲稱畀人「迫害」，一般人都會明白，呢啲只係想脫罪嘅藉口。偏偏，被法院判《妨礙司法公正》罪成、剛剛坐完十幾個月監嘅前全國政協委員劉夢熊，出獄竟然被部份傳媒捧為「英雄」，大搖大擺受訪之餘，仲有大班人夾道歡迎出獄，之後仲喺電台節目大放厥詞，啲「反政府」媒體好似執到寶，呢種「立場決定是非」嘅陋習，已經去到令人髮指嘅地步！

法官：劉夢熊明顯想干預調查

劉夢熊因為《妨礙司法公正》被法院判十八個月監禁，法官喺判案時講到明，劉夢熊寫畀特首梁振英封信，明顯係想對方同搵廉政專員白韞六去「干預東方明珠案的調查」，罪證確鑿。

呢個人出獄之所以受到關注，其實無非係個別「傳媒」想用佢把口嚟鬧衰「政敵」梁振英啫！劉夢熊成日話梁振英「迫害」佢，部份「反政府反梁反上腦」嘅人「不問細節」就話支持劉夢熊，囍雨真心想問：「其實你班人知唔知乜叫是非黑白架？」

劉夢熊案《妨礙司法公正》案法官姚勳智判刑時指出，呢單案嚴重之處，在於佢向本港最高層官員致函，要求干預調查；法官質疑，如果劉夢熊唔係想梁振英干預，咁又何必喺信中提及自己點樣義無反顧幫特首助選？同時又何需寫出期望特首向白專員「打招呼」等字眼？法官仲話，劉信中提及「以牙還牙，以眼還眼」，顯然係想梁、白二人「干預」東方明珠案。

要求政府官員干預刑事調查，絕對係違法行為，講都唔使講。無論原因係乜，因應自己單刑事案寫信畀特首，要求對方同廉政專員「打招呼」停止調查，點睇都係違法，信係佢親手寫、目的係叫停關於佢嘅刑事調查，講真，是非黑白好分明囉！

傳媒協助散歪理

香港嘅政治同傳媒生態就係咁悲哀，劉夢熊違法，證據確鑿，佢計劃去破壞嘅，正正係大家好重視嘅「司法公正」，佢因為被證實違法而被判監十八個月，而家出獄啦，點解大家會視為「英雄回歸」呢？尤其係個別傳媒，安排佢上節目訪問，任由佢自由發揮，即使明知係謬論都甚少質疑，唔通因為佢不斷喺節目鬧梁振英，傳媒就可以問都唔問最簡單嘅問題：「點解你當日要妨礙司法公正先」？

個別特首候選人，成日將要「團結香港」擺喺口邊，囍雨想講，呢種「只問政治，不問事實」嘅風氣如果持續，無論邊個上場都好，撕裂嘅社會都唔會復原，亦冇得復原！事事「政治指揮腦袋」，黑白不分、是非不問，總之政治立場不同或者政策措施不合心意，就將對方抹黑是惡魔，做乜都係錯，就算政策措施係好嘅、係利民紓困嘅都好，佢哋都視而不見。相反，真正犯咗案、犯咗錯嘅，就將佢捧成「被政治迫害嘅犧牲品」，甚至係「英雄」，呢種盲目同扭曲嘅行為，試問又點彰顯公義、消弭矛盾？繼續抱住呢種態度，香港人又點可能重新團結？唔好扮嘢啦！

圖片來源：大公報