上星期六，行政長官參選人（今日已成為正式候選人）曾俊華去選舉事務處提交160個提名，成為第一個正式報名參選行政長官嘅候選人；就喺曾俊華報名之後無耐，公民黨立法會議員郭榮鏗向傳媒「爆料」，話有提名曾俊華嘅建制派選委即日收到中聯辦電話，要求佢哋填多份提名表格畀林鄭月娥，即係「重複提名」，或借此令部分曾俊華嘅選委表格無效。對於呢個由郭榮鏗傳出嚟嘅「撬票」「陰謀」，囍雨覺得好詭異，薯片叔叔交咗手上嘅提名到選舉事務處，核實咗就「舉手不回」，冇得追番或取消，「重複提名」根本唔成立，係咪有人仲會多此一舉呢？咁究竟係咪身為大律師嘅郭榮鏗搞錯咗抑或佢有其他用意呢？

「重複提名」無效 何必多此一舉

退一百步，就算當真係有人同郭榮鏗講，有人想搞「重複提名」，有人要求提名曾俊華嘅建制派選委再填多份提名表格畀林鄭月娥，用意係要曾俊華嘅部分提名（例如11張或以上）因為有「重複提名」而無效，繼而失去做行政長官候選人嘅資格；但問題係，呢招根本冇用！

翻查《基本法》，清楚寫明每個選舉委員只可以提名一個候選人，而《行政長官選舉條例》亦寫明，「任何選舉委員作出的提名不得由他撤回或撤銷」；換句話講，如果當提名表格被確認後，就算有選委想提名其他人，或者撤回提名，都係唔得嘅。既然後來或者重複嘅提名都唔會有效，曾俊華候選資格既成事實，中聯辦或者個別人士仲會打電話畀啲選委，要佢哋填多一張提名票，只會白費工夫。如果要「撬票」，都係喺薯片交提名前「撬」啦！

「撬票」之說 陣陣疑雲

根據郭榮鏗對傳媒嘅講法，佢自己都話選舉事務處係審批最先遞交嘅提名表，「不存在之後收到重複提名而令到提名無效」，仲話中聯辦做法「多此一舉」，顯示中聯辦冇了解法律，又批評中聯辦「再次干預選舉」。郭榮鏗嘅講法，表面上合情合理，但囍雨認為，中聯辦有冇郭榮鏗講得咁「無知」呢？公民黨律師多，熟法律相信好多人都知，但係中聯辦自己亦有法律部門，咁真憑實據呢？

筆者落筆時，曾俊華嘅提名已被選舉事務處確認咗，即係正式「入閘」，而佢嘅頭號粉絲田北俊朝早都話胡鬚曾係想盡快「Lock」實啲建制選委，唔駛「走票」，連佢都唔信中聯辦會叫人「重複提名」。

郭榮鏗嘅說法是真是假，大家心中有數。但客觀效果係，經佢這麼一說，中聯辦同林鄭又加一宗「罪」，加深對林鄭同中聯辦嘅偏見。囍雨只係覺得泛民咁積極為胡鬚曾助選，不斷製造「造反有理」嘅假象，呃到「盲反者」，呃唔到心清眼亮嘅市民。

原圖：RTHK、政府網頁