政府早前入稟高等法院，司法覆核要求取消四名立法會議員資格，幾日前就有20名非建制派議員聯同124名選委、學者同多個專業團體聯署，要求政府取消司法覆核！聯署嘅聲明批評，特首梁振英以法律之名行「政治打壓」之實云云。老老實實，囍雨真心唔明點解今日香港一班所謂「知識份子」可以咁唔講道理，點解可以將執行《基本法》呢項特首嘅憲制責任抹黑成「政治打壓」？到底而家係政府以「法律干預政治」，定係非建制派以「政治干預法律」，唔畀政府依法辦事先？

沒有人違法 又怎會有人執法？

事實上，根據《基本法》第104條、《宣誓及聲明條例》，未有依法宣誓，都可能會被視為拒絕或忽略誓言，繼而失去議員資格；觀乎四名議員嘅宣誓行為，有人喺誓詞入面間加料，有人慢讀出冇意義嘅單字，有人將「中國」嘅「國」字讀到好似疑問句咁，係有拒絕、忽略誓言嘅嫌疑，到底係宣誓時「玩嘢」嘅議員有冇問題，政府依法辦事提出司法覆核，由最公正嘅香港法院作出裁決，請問有咩問題？

如果話政府係以「法律干預政治」或者進行打壓，倒不如話係非建制選委想以「政治干預法律」；須知道政府提出訴訟有根有據，高等法院講明，特首有執行《基本法》嘅「憲制責任」，執行的方法就係提出「司法覆核」！況且《基本法》、《立法會條例》亦賦予政府提出司法程序嘅權利，如果認為四名議員係唔應該被取消資格，又相信香港司法獨立，點解唔留番畀法庭作出裁決，而要威脅政府取消司法覆核？

仲有，大家記唔記得，查實政府早喺議員宣誓前一日，已經發聲明講得清清楚楚，立法會議員要必須依法宣誓，而且要完整讀出誓詞，唔可以改變內容。呢班咁嘅「議員」硬要挑戰法律，到底怪得邊個？

誰有負選民？

的而且確，幾個被司法覆核嘅議員都係有民意授權進入議會，但有民意授權，同係咪要守法，係兩回事。就算立法會議員有幾萬人投票進入議會，佢哋同其他人一樣都要遵守法律，如果因為佢哋有民意授權所以能夠漠視法律，先係唔公平、唔能夠彰顯法治嘅表現。

議員經歷選舉洗禮、民意授權，過程源於一個「法」字，簡而言之，一切都要「依法進行」。殊不知呢班所謂民意代表，喺排除萬難、正當要宣誓正式成為議員嘅時候，竟然公然挑戰《基本法》等法律，真正有負選民嘅，其實就係佢哋自己！唔該唔好成日話人「打壓」你，點解你班人唔撫心自問有冇做錯事先？點解今日香港嘅非建制派政客可以變得咁唔講道理？點解？

原圖：wenweipo