普天同慶呀！過咗兩個月，警方今日終於上門拘捕七名男子，呢班人涉嫌舊年11月初喺中聯辦外「非法集結」、「行為不檢」同「藏有攻擊性武器」，被捕者包括「港獨自決」組織香港眾志，以及激進派始祖「社民連」嘅成員。對於用違法方式抗爭，囍雨一直都係持反對態度，老土啲講句，犯得法就預咗要還架喇，唔係以為可以逍遙法外呀？偏偏呢班所謂抗爭者似乎唔係咁諗，警方拘捕疑犯後，社民連主席吳文遠同香港眾志秘書長黃之鋒隨即批評，一時話係「政治清算」、一時又話警方「無恥」。囍雨真心想問，依法拘捕係無恥的話，咁犯法後諉過於人又無唔無恥呢？
 
吳文遠老屈香港警察
 
大家睇清楚吳文遠講咩先。佢話：「當住差人面打人就冇事，遊行示威就要搜屋拉人，無恥簡直係無敵。原本今日晏晝要去灣仔警總示威，抗議警方選擇性執法，促使羅冠聰於機場遇襲事件的發生。點知大清早，警察居然全港大規模上門拘捕反釋法示威者，告行為不檢、非法集結、藏有攻擊性武器.....」
 
警方喺立法會議員羅冠聰被襲一事上冇做嘢？吳文遠可能真係發緊夢。警方尋日上午已經喺旺角同屯門拘捕兩名涉案人士，分別為53歲姓高男子同71歲姓唐男子，兩人涉嫌襲擊致造成實際身體傷害及非法集結被捕！咁都唔叫做咗嘢？咁點先叫做嘢？
 
囍雨一直相信，警方對任何立場示威者都係一視同仁。有人襲擊羅冠聰，當然就係上門拘捕啦，但唔代表反政府人士暴力示威，就可以逍遙法外喎，大家仲記唔記得去年11月6號，嗰班示威者做過咩先？當日，部分參加反釋法遊行嘅示威者，喺遊行結束後擅自去中聯辦抗議，期間一度「佔據馬路」、「癱瘓交通」、衝擊警方防線，並且同在場警察對峙，事件一直擾攘至凌晨先結束！
 
黃之鋒包庇護短
 
嗱嗱嗱，唔好講咁多，到底被捕人士有冇做過呢啲嘢先？如果有，咁到底批評啲乜？即係佔完馬路、阻礙完交通、衝擊完警方防線後，唔通警方都唔可以捉你，唔捉你就叫「公義」？傻的嗎？
 
除咗吳文遠外，有「過街老鼠」之稱嘅秘書長黃之鋒亦話今次香港警察係「政治清算」，仲話：「香港眾志在此亦都強調，整個中聯辦遊行雖然是公民抗命，但我們數個主辦單位從頭到尾都是堅持一個非暴力原則。」係囉，你都認「公民抗命」咯，即係認有違法啦，咁即係冇屈你班人啦，咁到底清乜嘢算呢？
 
囍雨認為，呢班激進組織最令人不齒，就係「做得出，唔敢認」。唔好畀囍雨批中，社民連同香港眾志除咗話今次係「政治清算」外，好快亦會話係「政治檢控」！但老實，政乜嘢治檢乜嘢控先？你講到明公民抗命，咁即係要犯法，犯法畀人告，點解係「政治檢控」？而家告你殺人放火姦淫擄掠咩？唔係吖嘛，而家係告你班人真係做過嘅事嘛，咁做乜屈政府「政治檢控」先？無他嘅，咪就係「做得出唔敢認」囉，明白嘅，囍雨就一早睇透晒喇，希望其他香港人都睇得到啦！

圖片來源：無綫新聞截圖