噚日係一年一度嘅「2017年法律年度開啟典禮」，律政司司長、終審法院首席法官等人士嘅致辭，成為各界關注嘅焦點，尤其係近年司法界面臨前所未有嘅挑戰，法官面對種種質疑，點樣守護香港嘅法治同司法獨立尤關重要。喺幾名司法、法律界代表致辭當中，囍雨對終審法院首席法官馬道立一番說話感受至深，因為佢講出咗一個重點，就係法庭處理公案當然可以畀公眾評論，但前提是應該有理可據、慎重。

自由並非放任 有權利亦有義務

馬道立喺演辭中提到，《基本法》賦予我哋權利同自由，但我哋都要遵守法律，而此等法律又包括他人嘅權利同自由。近年社會出現一種歪風，歪風喺「違法佔領」之後更為明顯，就係好多人只談自己嘅自由，不惜破壞他人自由、權利。好似「我要爭取『真普選』所以佔領，你嘅生活、生計要讓路」、「我要保護街邊小販，所以警方干預我就動手」等等；呢啲行為唔單止侵害到他人自由、權利，更甚係我哋嘅社會受到破壞，社會難以正常運作，亦令法庭受到巨大壓力。

老實講，囍雨好欣賞馬道立嘅堅持，處理案件時公平且一視同仁，一切根據法律判決，這是法庭最大的責任。馬道立又提及到，法官壓力並非來自外界，而係在於法庭須作出正確判決嘅責任，而就算面壓力、招聘法官嘅困難也好，都會盡力確保司法人員嘅質素維持於最高水平，絕唔妥協。

可評論法庭 但應有理、慎重

坦白講，對於法庭、法官近年處理唔同案件都受到質疑，呢個唔係單單一個政治陣營嘅問題；例如，喺面對一啲違法甚至暴力事件嘅時候，建制陣營不時有支持者認為法庭「輕判」；另一方面，明明係違法嘅暴力案件，非建制陣營又可以講成係「政治打壓」。囍雨認同馬道立嘅講法，評論法庭、法官係可以，但應該有理可據、慎重，如果明明犯法都要話係「政治打壓」，咁香港嘅法治由從何說起？

近年，無論係司法覆核嘅公案，抑或涉及暴力嘅刑事案，案件到法庭審理嘅時候，多多少少都會受到質疑。囍雨覺得最氣憤嘅，係一啲違法者明明自己講要「公民抗命」、「以法達義」，聲稱自己違法係為咗「公義」，亦會因為抗爭而承擔罪責，但係一到咗被正式控告嘅時候，就話自己係受到「政治迫害」、「政治打壓」等等。例子太多，實在一本電話簿咁厚，掟蛋掟玻璃杯被控又係「打壓」、暴力衝擊警方又係「打壓」，唔通違法都唔告你先唔叫「打壓」？

老實講，乜家陣有人拎枝槍指住你班人去犯法咩？乜你哋冇所謂嘅「自由意志」咩？定係你哋覺得只要手執民主「旗幟」，就唔駛守法先？

囍雨始終深信，當唔同案件到法庭審理嘅時候，法官會依法辦事，一邊話要守護法治，一邊又要「批鬥」法庭嘅做法，先係真正破壞法治嘅行為；其中一件案令囍雨印象好深嘅，就係黃毓民喺立法會向特首掟杯一案，明明案件就係一宗明顯嘅刑事案，但黃毓民嘅支持者竟然喺法庭大叫「政治檢控」，仲用粗言穢語辱罵法官，鬧法官係「狗官」。試問一句，道理何在？

當有人成日聲稱要守護法治嘅時候，佢哋又同時成日質疑法庭，甚至講到法官「政治打壓」等等，囍雨真係要問一句，你哋到底係守護法治，定係破壞法治？到底係民主派，定係反民主派？

原圖：takungpao