「舊債未清，新債免問」，有時候有人問我哋借錢，如果對方「舊債」未還，我哋通常都會回敬一句「喂，你好似有條舊數都未清喎，又想借？」講緊邊個，之唔係兩年前「風頭」一時無兩，喺香港作浪興波嘅「佔中三人組」囉；三人組之中嘅兩子陳健民同朱耀明搞咗個「守護公義基金」，幫四個被政府司法覆核嘅議員籌錢打官司，到早幾日元旦遊行，連「謬論王」戴耀廷都出埋嚟一齊籌款。囍雨喺度想代香港市民問一句：兩年前「佔中三人組」搞「佔中」時答應會公開帳目，但到咗今日都未公開帳目「埋單計數」，而家又走出嚟籌錢，仲有冇無恥啲呀？

未承擔罪責 未交代帳目

「佔中三人組」兩年前搞違法佔領時，大義凜然講過要「以法達義」、「承擔罪責」，又話會公開有關帳目。結果？佢三個所謂嘅自首，就係去警署話自己犯咗《公安條例》第17B條，即只是承認「參與未經批准公共集結」，然後乜都唔講，名副其實係「假自首」；至於公開帳目方面，戴耀廷幾個月前仲「面不紅、耳不赤」咁話要「問番個會計師點解做得咁慢」喎，係囉，咁唔知你問到未呢？

身為法律學者，面皮竟然可以咁厚，囍雨唔知算唔算「前無古人」，不過就肯定係奇人奇事囉！

講返今次單「眾籌」，喺「舊債」唔清唔楚嘅情況下，三人組又想幫非建制派議員「籌旗」，唔係唔可以，不過囍雨希望香港政治人物可以公公道道，「籌新債」之前，麻煩清清楚楚交代之前籌咗嘅錢用咗去邊，剩咗嘅又去咗邊。就算唔講佢哋公開籌款係咪「攞正牌」（即經過申請嘅公開籌款），除非佢哋將啲錢用到一蚊都冇剩，否則剩咗啲錢就算捐咗畀慈善機構，總會有個交代啩？到底真係正如戴耀廷所講，係個會計師計得慢，定其實佢哋有其他不可告人嘅秘密呢？

為議員眾籌打官司　或涉及「助訟」

另外，對於呢班非建制派為4名議員公開籌錢打官司，囍雨懷疑當中會唔會涉及「助訟」嘅罪行；其實早前就有唔少法律界人士解釋過，眾籌打官司有「助訟」之嫌，假如有人出錢畀人打官司，而又分享官司成果，就更加有「利益衝突」添。雖然香港好似未有正式明確法例監管「眾籌」，不過既然「在法」，眾籌有可能違法；「在情」，三人組紀錄不良；「在理」，又係幾個議員涉嫌違法在先，政府提出司法覆核只係履行憲制責任，「佔中三人組」繼續「盲撐」係都要「死攬」呢幾名議員，佢哋行為處事有幾公道，大家心照啦！

原圖：takungpao