俗語講得好，「無規矩，豈能成方圓」，而講到最冇規冇矩，最近嚟講一定係梁頌恆同游蕙禎！今日係立法會行管會要求佢哋交還186萬薪津、辦事處預支營運開支嘅限期，但係佢地唔單止冇「回水」，仲連要求延期還款都冇，咁做法係咪擺明走數呢？係咪以為自己拎住「港獨旗幟」就可以無視立法會嘅規則呀？據報佢哋連立法會通行證同鎖匙都未交還，仲要失埋蹤，無恥到極，囍雨真係愈諗愈嬲！

所謂「欠債還錢，天經地義」，既然佢哋已經畀高院裁定撤銷議員資格，交番薪津、辦事處預支營運開支根本合情合理；但係，佢哋由始至終都好似冇諗過要「回水」咁，記者問佢哋點睇追討佢哋薪津時，仲要「正義凜然」咁形容「追討薪津」係一個幼稚嘅行為。講真，佢哋唔還錢？預咗架啦！佢哋唔還錢仲要講到義正詞嚴咁？都預咗架啦！但唔還錢之餘，連同秘書處講聲話要遲啲還都冇聲，呢啲唔單止係無禮貌，根本就係視規章如無物，自己想拒絕誓言就拒絕，想唔還錢就唔還錢，呢啲所謂前議員被DQ，真係天經地義！

誠如梁頌恆之前所聲稱，佢話自己會去信秘書處，指秘書處應該等法院有最終裁決先決定係咪收番有關款項！如果根據梁頌恆嘅講法，秘書處應該收到要求延期還款或者類似通知先啱，但而家秘書處話冇收到要求延期還款，呢件事真係一個謎！唔知梁、游會唔會出嚟解釋下呢？囍雨就認為，就算案件要到終審都好，唔想還錢都好，都應該清清楚楚回覆、交待，好似有啲大專生問政府借完學費未有錢還都會申請延期還款一樣，梁、游如果冇咁做，真係連普通學生都不如。

可能因為梁、游最近忙住上訴，所以唔得閒理立法會「追數」啦，不過講開上訴，囍雨又忍唔住要講下佢哋眾籌果筆「數」喇！之前有報章講過如果梁、游要終審，敗訴嘅話大約要畀600萬元訴費、律師費；如果佢哋終審要畀200萬元左右，之前原訟、上訴要畀400萬元，咁囍雨就有疑問喇，佢哋而家仲話要籌500萬元，即係想啲人幫佢哋找埋原訟庭、上訴庭輸咗果條數？嘩，議員薪津、預支辦事處開支果啲用咗又唔還，自己輸咗官司又向市民籌錢找數，佢哋咁樣邊度「有得輸」架？仲有喎，市民如果捐錢畀佢哋算唔算「協助或慫恿其他人進行法律訴訟」，即係「包攬訴訟」先？唉，梁、游自己衰就好喇，唔該唔好再累街坊，Please！

原圖：RTHK