人大常委會就《基本法》第104條作出解釋，每逢人大釋法，坊間總會出現種種質疑，包括批評司法獨法被「破壞」，今次當然唔例外啦。可能而家社會氣氛比較詭異，唔講到啲嘢「大一大」都無人理，例如戴耀廷就話《基本法》話香港土地屬於中央，擔心人大可隨意解釋更改，無限制、無節制咁話，講到中央會收番香港啲土地、房產咁。殊不知《生果日報》專欄作家、前電台節目主持李慧玲仲巴閉，講到釋法可以釋到香港人「冇工揀」、「文化被限制」等，囍雨真係「不得不服」！
 
推至極端 唯恐天下不亂
 
睇番李慧玲今日喺生果日報篇〈釋法點解關你事〉，裡面話釋法令「全港市民受害，你我不能幸免」，原因有兩個，其一係「《基本法》第33條，香港居民有選擇職業的自由，人大常委原來可以隨時釋法，所謂選擇是鳥籠裏的選擇，你可以在政府指定的兩種職業，上山或者下鄉，自由選擇」，另一個就話「《基本法》140條，香港特別行政區自行制訂文化政策，但原來一旦釋法之後，所謂自行制訂都不能夠偏離文以載道原則，小說電影結局好人要有好報，壞人一定不得好死」。
 
嘩，講到咁誇，囍雨真係好驚囉，咁香港咪「巧大鑊」囉？
 
咪住先，將選擇職業自由變成上山、下鄉二選一，明顯係將「職業自由」嘅概念完全相反，如果自由就唔只二選一，如果只可以二選一就唔叫自由啦，李慧玲啲邏輯力會唔會「太強」呢？至於特區政府自行制訂文化政策會唔會變左不能夠偏離「文以載道」，囍雨想講《基本法》除咗第27條有寫香港居民有出版自由，第34條亦有寫香港居民有「文學藝術創作和其他文化活動的自由」，李慧玲到底係唔熟書，定係好似「砌生豬肉」咁砌得就砌先？
 
無論係戴耀廷抑或李慧玲都好，佢哋將香港嘅情況推到極致，講到好似文革時期咁，唔知真係以為香港變到好似4、50年前嘅內地咁；不過，就算係文革都喺40年前畀內地推翻啦，而家嘅中國亦已經好唔同，李慧玲佢哋仲講呢啲，擺明就係靠嚇，用英文講就係Scaremongering（製造恐慌、危言聳聽），用意何在？你懂的！
 
李慧玲一向有佢講冇人講
 
對於李慧玲嘅「創作力量同幻想」，並無赫到囍雨一跳，因為李慧玲對於演繹故事嘅能力，囍雨一早已經深切體會過。舉個例，兩年幾前李慧玲畀商台解僱，話自己係被打壓，又話商台為續牌「跪低」，但同一個記者會內，佢又承認自己曾得罪廣告客戶、自己作為新聞工作者可以監察包括商台嘅廣播機構、批評上司「有破壞無建設」等；嘩，玩到咁串，正常員工畀人解僱完都會唔出聲啦，李慧玲「罪行滔天」都仲可以砌番商台，所以囍雨話「不得不服」，讚佢「厲害」絕對有原因嘅。
 
圖片來源：香港電台即時新聞