最近前廉政專員施百偉（Bertrand de Speville）來港出席論壇，談論有關對廉署工作嘅睇法，坊間都好關心佢對於廉署近日人事變動有咩睇法，好多媒體、政客甚至網民都瘋狂分享有關佢建議廉署修例嘅sound bite。不過，囍雨就留意到，其實施百偉講咗唔少同樣值得大家深思嘅說話，包括輕率嘅猜測或指控(wild allegations)會損害廉署嘅聲譽同士氣，又表示認同現任廉政專員白韞六嘅講法，廉署工作有時都係機密，唔應該喺公眾領域隨便議論。   施百偉：署任安排無不妥   作為回歸前最後一名外藉廉政專員，囍雨相信由施百偉回應署理執行處首長李寶蘭終止署任事件就最有說服力，施百偉之前致函到英文報章，用番自己當年同徐家傑解約嘅例子，指出當時就算係時任港督彭定康都無參與決定，只係「被知會」解僱咗徐家傑。坊間經常用未經證實嘅傳言代替事實，指控李寶蘭事件係廉署受到干預，引用施百偉嘅講法，香港已經變得更加「政治化」，佢個人就認為事件非常不可能係因為政治干預或者壓力，又指出署任工作可以係基於「行政方便」，佢自己曾經擔任署理法律專員超過一年，但最終都冇正式就任。   事實上，稍為熟悉廉署運作嘅人都知道「廉署保密，密密實實」，囍雨真係好好奇，連廉署內部同事都未必知道其他組同事查緊乜案同查成點，點解有啲政客會知道咁多嘢，仲可以開埋記者會講咁多嘢呢？唔講某啲政客講嘢毫無根據，一味係咁講「知情人士」、「內部人士」等等，囍雨收到嘅訊息非常明確，就係呢啲政客話畀大家聽，選舉又到喇，又係時候要行出嚟「做嘢」，至於係咪有理有據？唔緊要啦，最緊要「吸睛」嘛！   妄加指控損廉署   誠如施百偉所言，輕率嘅猜測或指控可以損害廉署嘅聲譽同士氣，廉署工作有時係機密，唔應該喺公眾領域隨便議論。囍雨認為，大家可以諗下，如果每逢有政客走出嚟「吹風」講廉署，大家就一窩蜂對廉署評頭品足，咁廉署呢幾十年嚟建立嘅公信力就會受到損害，工作變得舉步維艱，最終受影響嘅，係全港市民！唔好忘記，香港今日之所以成功建立咗廉潔文化，係因為當年廉署不偏不倚、不受外界影響地奮鬥，為香港移風易俗！   有啲政客，話要喺立法會用特權法查廉署事件，囍雨真係好想問，所謂嘅廉署事件，到底係邊個製造出嚟架先？人事變動被無限放大，然後又拉埋立法會嚟講，目的係咩，相信大家好清楚。至於要立法會用特權法查廉署，囍雨只係想講句，如果真係堅守程序公義，到底應該畀廉署繼續佢獨立嘅調查工作，定係要喺立法會公開所有證據，繼而影響到調查工作同公平審訊呢？特權法對事情未必有幫助，囍雨只係見到啲政客利用特權法為自己造勢，將政治利益凌駕於社會利益。   如果大家要仔細分析施百偉嘅講話、聲明內容，囍雨建議大家睇下唔同嘅報導，睇清楚施百偉點樣維護廉署聲譽同士氣，唔好畀啲政客斷章取義、「投其所好」。   原圖：rthk