四年一度嘅奧運會開幕，香港社會亦自然開始關注呢項體壇盛事。但唔知大家覺唔覺，今屆香港嘅奧運氣氛有啲怪怪哋？無錯，一如過去幾年嘅香港咁，今屆最Hit嘅奧運繼續被個別傳媒同網民全面政治化，例如咩中國痛失「第一金」、國家體育體制有問題等等，囍雨認為呢，連呢項世界體壇大事都被無限上綱，甚至利用國家隊嘅成績，大造文章肆意攻擊國家，呢種泛政治化取態，某程度上已經令奧運會失焦同失去意義。   國家隊喺第一日賽事未能奪金，某班人就好似中咗六合彩咁開心到癲晒，尤其係支持「港獨」嗰班，更好似個個食晒大補丸咁上晒頭。但去到第二日，當國家隊開始拎金牌之後，成班「港獨份子」又收晒聲唔講比賽成績，反而走去巴西廠商印錯中國國旗呀、內地網民反應呀咁，講真，會唔會無聊咗呀？乜奧運會唔係應該欣賞各國運動員嘅表現咩？   其實一如既往，奧運會仍然係充滿正能量嘅場合，部份喜歡事事政治化嘅網民就唔理咁多，一於鬧咗中國隊先算。但老實講，國家隊運動員其實好多都秉持住運動家的精神去參賽，喜歡鬧中國嘅人，佢哋有冇了解過先？例如中國籃球隊大敗畀美國，用一個角度睇可以話中國隊「水皮」，畀美國隊大炒特炒；但如果用呢一個角度睇，中國隊大敗其實都無氣餒，其中主將易建聯仲話「能夠同美國呢種級數嘅強隊交手，已經係中國隊自我提升嘅好機會」。呢種失敗但積極、樂觀面對嘅運動員個性，其實都非常值得分享，可惜，大部份激進網民都扮盲當睇唔到。   係嘅，體育政治化並唔係今日先出現，世界各國都有咁嘅例子，但唔代表呢啲例子值得學習囉。呢幾日睇新聞，大部份有關奧運嘅分析同埋冷嘲熱諷，基本上已經蓋過「奧運」同「體育」本身。囍雨認為咁樣唔係一件好事，因為奧運，除咗係希望將各項運動放喺世界舞台上，畀運動員比拼之餘，亦希望藉此推廣體育活動，同埋展現運動家的精神。   成日話「比賽第二，友誼第一」，呢句咁老土嘅說話可能已經不合時宜，但囍雨覺得大家喺對待奧運、體育同埋運動員嘅時候，最起碼要做到兩個字，就係尊重。有運動員默默耕耘多年，就係為咗喺比賽場上爭取榮譽，我哋見到佢哋輸咗，係應該支持、鼓勵定係恥笑呢？如果大家選擇恥笑嘅話，囍雨只能夠講呢個係大家嘅自由，只係囍雨認識嘅香港人，唔應該係咁涼薄囉！   原圖：nipic