由於討論得實在太過熱烈，本人實在抵唔住頸，決定再次、再次寫關於梁天琦嘅新聞，事緣法律界人士日前出咗個聲明，大約意思話選舉主任無權判斷梁天琦係咪真心擁護《基本法》，無理由喺佢交足文件嘅情況下仍然否決佢嘅提名資格，今日法律界選舉委員、大律師公會前主席陳景生上電台接受訪問，表示選舉主任判斷梁天琦提名無效，等同話佢發假誓，係嚴重嘅指控，應該交由司法機構審訊，又指而家《基本法》已經有條文處理議員發假誓嘅情況。囍雨雖然唔係法律方面嘅專業人士，但用常人角度理解都覺得唔係十分合理，喺度又忍唔住要發表意見。   褫奪當選議員資格 現實上唔可行   首先，如果引用《基本法》第79條，當立法會議員「行為不檢或違反誓言而經立法會出席會議的議員三分之二通過譴責」，立法會主席可以宣告該名議員喪失立法會議員資格。只要大家對立法會嘅議席分佈有啲了解，都應該知道要有三分之二嘅議員通過譴責，似乎都無乜可能。泛民主派即使口就話「唔同意港獨」，但咁又點？泛民主派一向「政治立場為先，道理道德為後」，即使港獨派事後有違反擁護《基本法》嘅言行，泛民會同意譴責咩？多餘啦！囍雨唔係靠估，係講歷史、講事實！   唔信，大家記唔記得2011年，社民連梁國雄衝擊替補機制諮詢會場，被判監兩個月，立法會2012年曾經討論按《議事規則》褫奪佢議員資格，但因為泛民議員反對，有關建議被否決。睇到未呀？呢個就係泛民喇！   選舉主任有權審視有關規定係咪已獲遵從   講到呢度，可能有人會誤會，質疑囍雨係咪唔將法律、程序公義放喺最先位置，囍雨可以喺度答大家，絕對唔係！如果大家睇《立法會條例》第40條第40(1)(b)(i)條，上面寫住提名表格包括「示明該人會擁護《基本法》和保證效忠香港特別行政區的聲明」，表面上睇好似話簽咗聲明就得，唔一定要真心擁護同效忠；但係睇埋《選舉管理委員會(選舉程序)(立法會)規例》541D章、第16條，裡面都有寫明選舉主任要決定提名是否有效之餘，選舉主任都要睇下《立法會條例》第40條嘅規定係咪已獲「遵從」，「遵從」規定係咪真係指簽咗名咁簡單呢？   有法律學者成日話根據條文解釋如何如何，但囍雨睇埋選委會規例，就算都只係睇字面，上面都有寫《立法會條例》係要「遵從」嘅；選委會規例541D章、第16條仲寫明，唔計某啲情況，提名有冇效都要睇埋候選人係咪冇損害《立法會條例》第40條嘅原則，所以如果以條文解釋，囍雨此等識字但唔係法律專業人士，都係認為選舉主任決定梁天琦提名無效，係合情、合理同合法。   原圖：歐新社