梁天琦畀選舉主任決定佢提名無效，搞到全城鬧到熱哄哄，對於坊間話梁天琦已經唔搞港獨又簽埋文件，無理由決定佢提名無效呢單嘢，囍雨覺得其實唔駛點拗，因為梁天琦自己呢頭回覆完選舉主任唔會搞港獨，轉頭就出嚟話香港有唔少人支持港獨，佢要入議會代表佢哋，係咪虛假聲明，已經好清楚。其實大家應該了解下作出虛假聲明嘅嚴重後果，等大家知道有關聲明真確嘅重要性。   虛假聲明屬重罪   根據《選舉管理委員會（選舉程序）（立法會）規例》（第 541D 章）第 103條，任何人喺選舉嘅有關文件中作出明知喺要項上屬虛假嘅陳述，或者任何人罔顧後果地喺文件中作出喺要項上不正確嘅陳述，均屬犯罪，任何觸犯「作出虛假聲明」嘅罪行，可以被罰款之外，仲有可能被判監6個月。   老老實實，有啲人或者覺得選管會今次對於提名資格把關得太緊，但囍雨就認為如果作出聲明或者提交表格果時有虛假陳述，根本絕對唔止可以取消提名、候選甚或當選資格咁簡單，而係分分鐘要負上刑責同坐監，同埋如果單單係話自己無就無，咁仲邊有人被入罪呢？   法律界人士意見紛陳正如資深大律師、前大律師公會主席湯家驊所講，「如果一個人宣稱自己擁護《基本法》，選舉主任就毋須再懷疑，咁豈不是所有喺法庭否認控罪嘅人，就要即時被判無罪？」，湯家驊仲補充，選舉主任都係按法例有權裁定候選人資格，要求參選人簽署聲明擁護《基本法》係實際要求，並唔單只係做手續咁簡單。   有法律界選委認為《立法會條例》第40條所要求嘅，只係要參選人提交「聲明」擁護《基本法》，而唔係選舉主任可以查訊聲明係咪「真誠」擁護《基本法》；囍雨就認為雖然條文無講明聲明係咪要真誠，但睇番《選舉管理委員會(選舉程序)(立法會)規例》541D章、第16條，都寫明選舉主任要決定候選人提名是否有效，當中包括《立法會條例》第40條、即要擁護《基本法》嘅規定係咪已獲「遵從」，如果話選管會規例所講嘅遵從規定只係簽聲明而毋須理會其真偽，咁相關法律同一紙空文又有咩分別呢？   圖片來源：shm