繼香港民族黨陳浩天、香港民進黨楊繼昌以及城邦派中出羊子等參選人之後，本土民主線既梁天琦亦收到選管會通知，話唔能夠信納佢擁護《基本法》，所以裁定佢提名資格無效。囍雨一直好奇怪，既然呢班參選人講到明又擺到明係想推動「港獨」，咁點解仲要參選立法會呢？乜立法會唔係組成特區政府既一部份咩？   須知道，立法會既法律地位係由《基本法》賦予，根據《基本法》第66條「香港特別行政區立法會是香港特別行政區的立法機關」；由《基本法》第66條到79條，都係講有關於立法會職能等事宜，如果一班港獨人士唔願意擁護《基本法》，又何必要參選、加入由《基本法》賦予權力而存在既立法會先？   選擇性擁護《基本法》？   唔好同我話佢哋擁護《基本法》部份條文呀，成日將第26條「香港特別行政區永久性居民依法享有選舉權和被選舉權」、同第27條「香港居民享有言論、新聞、出版的自由，結社、集會、遊行、示威的自由，組織和參加工會、罷工的權利和自由」等等擺喺口邊；喂，咁第１條「香港特別行政區是中華人民共和國不可分離的部分」呢？第1條就唔使擁護？乜選擇性擁護《基本法》就叫做真誠擁護《基本法》咩？咪玩啦！   可能有人會認為，港獨人士就係要借助立法會既平台、資源，去宣揚自己既港獨思想，但囍雨就認為，一邊要反政府、反中央，一邊又要攞政府資源；或者一邊唱衰《基本法》，一邊又簽要擁護《基本法》既提名表格等做法，非常自相矛盾，港獨人士同佢哋既支持者唔覺得肉酸，都應該諗下畀人取消提名資格係咪合理。   拒絕「港獨」乃「依法辦事」   搞獨立，就係要推倒現有政權，包括行政機關、立法機關、甚至整套法律。立法會正正係香港憲制／建制既一部分，港獨人士要搞獨立，呢種否定體制又要參與體制既邏輯，囍雨真係睇唔透。話佢哋貪立法會議員高薪厚祿或者有啲衰，但如果港獨人士唔係覬覦立法會既資源，又點解非參選不可？   港獨人士當中最出名既梁天琦，提名資格都畀選管會決定為無效，相信個別媒體同人士會繼續大做文章，但囍雨希望大家諗真啲，一個寫明要擁護《基本法》既選舉遊戲，拒絕一啲唔願意擁護《基本法》既人，或者連提名表格都未填好既人與，到底係「依法辦事」，定係所謂既「政治打壓」呢？   圖片：Wenweipo