嚟緊九月就係立法會換屆選舉，今屆選舉，絕對可以用「群魔亂舞」去形容。點解？因為今屆多咗班「假本土，真港獨」既港獨份子參選囉，用「魔」字絕不過份。不過，搞「港獨」都未算最衰，更過份既係有班所謂法律界人士，用「法律外衣」將「港獨」合理化，呢班先至係最誤導市民既「魔中之魔」，令人不齒。   囍雨講緊邊個？咪就係立場偏頗既傘後組織「法政匯思」囉。老實講，呢個由年輕律師組成既組織，雖然反政府立場鮮明，不過亦唔係次次都唔講道理，但近日講到選舉主任角色問題時，就真係離晒大譜。佢哋其中一個成員梁允信，日前接受訪問時話，選舉主任不應該承擔，去做「否決任何人參選資格既政治決定」，因為公務員要保持「政治中立」咁話。  

選舉主任從未「政治審查」

  梁允信上述說法其實好大問題，因為：1）香港法例賦權選舉主任審核所有報名者既參選資格，包括報名者有冇依據規定，簽署報名表格上「擁護基本法」的聲明；2）選舉主任所做既並唔係「政治審查」，而係根據香港法律規定去審核，換句話說，呢個係選舉主任既「法律責任」，話係「政治審查」，根本就唔合理。   冇錯，公務員的確要「政治中立」，無論持乜嘢立場既人當政都好，佢哋都必須依據法律所賦予既權責為市民服務。正因為咁，否決唔合資格參選人既候選資格，先至係真正「依法辦事」。  

「法政匯思」認為公務員只係「橡皮圖章」？

  《立法會條例》第40條規定，立法會選舉參選人，須在提名表格簽署聲明，表明擁護《基本法》同保證效忠香港特別行政區。你唔肯簽、或者選舉主任根據法律判斷聲明虛假不實，自然就要否決你既候選資格，唔通梁允信認為選舉主任只係「橡皮圖章」，唔需要履行職責？ 仲有，大家成日聽「政治審查」，當中包含咗「憑個人喜好去做決定」既意味，但事實係，選舉主任而家所做既只係「法律審查」，不含個人政治主張或政治判斷，胡亂扣上「政治審查」既帽子，真係好想問一句：「批評者居心何在？」   今日香港，無啦啦加個「政治審查」、「政治檢控」既批評上去，彷彿就可以將「不合理變成合理」。如果好似「法政匯思」咁講，選舉主任唔應該履行法定責任去審核參選人既候選資格，咁即係全香港公務員都唔需要返工，個個唔使做就可以出糧呢？試問有邊個公務員或者公營機構職員，唔係履行既法定責任去審批或者執法架？ 所謂既「法律界人士」，麻煩講兩句吖！   圖片來源：takungpao