陳太一出嚟，梗係又硬SELL自己個政改方案，最新鉅獻簡直笑爆咀，話特首參選人就算過唔到半數提委支持，都可以出閘做候補人喎，最爆係呢個候補人個名擺埋喺選票度畀人投票喎！下？我無聽錯呀嘛，唔過半數都出到閘，仲要畀選民選埋？嘩，咁咪即係我去參選奧運，就算過唔到初賽都照入決賽啦！嘩，咁慘啦，奧運咪成萬人一齊跑100米？陳太妳諗下都知自己荒唐過荒唐啦，難得妳仲係度死撐。

陳太妳咪玩啦，成個831規定，參選人要過半數提名，先可以出閘架嘛，妳唔好以為自己死撐符合831就等於真係符合先得架，唔通我話自己係周潤發，人地就真係信我係發哥咩？唔信人地，都聽下聽眾點彈妳呀！查實講真，陳太妳係咪因為最近無咩人理妳，所以諗啲咁出位兼離晒譜嘅方案，想引人注意呀？講到尾，多得妳，先令到我地有機會笑爆咀囉！