//繼公民黨維護網站後，教協尋日都靜靜雞整頓Facebook專頁。其實班領導層咁驚犯法坐監，一開始唔犯法，咪咩事都冇囉。今日搞成咁，都係教協自己攞嚟！//

咩叫「利益當前，奮不顧身；一到揹鑊，就做縮頭烏龜」？睇睇教協就知啦。話說，被內地官媒炮轟為「毒瘤」嘅教協，繼周二突然宣布解散之後，尋日Facebook專頁仲靜靜雞地「被消失」。直到深夜，專頁「被復活」果陣，教協已經將咩咩咩反國教、「佔中」、反修例、呼籲罷課不罷教同撐違法被捕教師等等嘅Post，一一刪走。

其實，教協龜縮都唔係第一日嘅事，就係宣布退出支聯會後，教協就不動聲色地將官方網站嘅「社會」欄，由76頁刪剩5頁，跟住再刪剩2頁，然後到宣布解散時，就即刻全數刪除，留返「解散」嘅內容響官方網站「新聞稿」一欄。教協領導層咁驚青，唔通係驚《國安法》埋身，想嘗試洗底甩身？

嗱嗱嗱，就算教協刪咗內容，大把人一早就截圖保存啦。如果犯咗法，以為洗咗底就咩事都冇，教協咪咁天真啦！睇返佢嘅合作夥伴公民黨，舊年人大通過《國安法》前夕，該黨就話網站維護，將之前有問題嘅內容一一下架。到最後公民黨咪又係有幾名前成員，因涉違《國安法》，留係監倉度，「令人生更精彩」。教協想透過刪網站內容，避過法律責任，簡直就係痴心妄想！

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk