陳方安生同李柱銘兩位泛民元老，近日去咗英國見完副首相，之後又去咗英國國會外交事務委員會聽證會，話要求英國切實落實《中英聯合聲明》，唔好剩係做「旁觀者」喎。
 
佢哋話，國務院早排發表既《白皮書》代表中央對港政策已經改變，而且係對《基本法》條文做咗新既解釋喎！英國班議員當然冇畀佢兩個呃到啦，有人仲引述權威智庫、英國皇家國際事務研究所既意見，指出《白皮書》並冇顯示北京更改對港政策，仲話《白皮書》根本唔係法律文件，所以中央亦冇為《基本法》做新解釋咁話！
 
查實唔止咁架，權威智庫既評論報告仲話，北京只係重提一貫既對港政策，《白皮書》之所以喺香港引發激烈批評，全因為香港有人想喺《基本法》條文之外搞「普選」，一切只係政治操作，根本同《白皮書》既內容無關！
 
呢個智庫喺全球非美國系智庫中排首位，英國政壇事無大小都會參考佢既意見，執筆既研究員又係住喺香港既英國人，人哋都唔覺《白皮書》有問題，或者破壞《中英聯合聲明》，咁兩位老人家想點呢？走去人哋國會亂吹一通，唔怪得畀人當面質疑，搞到出晒醜啦！