睇咗民主黨籍律師陳莊勤既文章《沉默的螺旋》，第一個反應係擔心陳律師挑戰本地兩間大學民，會畀班「民主鬥士」群起而攻之；第二個反應係深表認同陳既觀點，無論係本地大學啲民調既完整、可信性，抑或近年出現，由一眾號稱民主派人士製造出嚟既「寒蟬效應」，都令囍雨同身邊朋友喘不過氣，有時候想開聲講下意見，都要度一度講完會唔會畀人圍攻。

對於中大、港大既民調研究特首同官員評分，其實囍雨一路都覺得睇完就算，因為我心知道「認真就輸了」，如果民調入面有少部分人玩野全部畀0分，又或者小部分畀一百分，足以令受調查對象由合格變成唔合格，或者由唔合格變成合格。

仲有，評分呢樣嘢其實好得意，正常嚟講就算好滿意一個調查對象，畀80分佢已經相當之高。如果主觀上唔鍾意調查對象，畀0分、5分或者10分，真係不足為奇。好似你畀香港人優先班港獨份子去畀分，大家估吓又會唔會畀特首梁振英零分吖？如果評分呢個做法唔能夠全面反映實情，倒不如直接問受訪者「滿意」定「唔滿意」調查對象仲好啦。

陳莊勤講到明，佢寫文章挑戰大學民調權威既時候，已經有朋友勸佢唔好寫，怕佢畀人攻擊，畢竟佢喺國教風波入面試過撰文質疑過到底係「政府洗緊人腦」定係「某啲人對年輕人洗緊腦」，結果有幾慘，大家有眼見！有趣既地方係，其實有唔少有識之士，包括學者當時都同佢有相同觀點，只不過驚畀人鬧，又覺得唔關自己事，所以無乜人敢表態。

唉，呢啲咪係「白色恐怖」囉！立場同自己唔一樣就群起而攻之，今日香港唔少自稱係民主派既人都好喜歡咁做，目的就係令到異見人士唔敢出聲，令到萬馬齊喑，異見者齊齊摺埋兼收皮。尤其喺網絡上呀，批評、侮辱甚至人身攻擊就更加係幾難聽都有。

處身喺政治立場決定一切，黨同伐異既「自由」社會，我地唔少人都好似「沉默的螺旋」理論入面，怕被孤立而沉默、往下沉既螺旋。囍雨好認同陳莊勤既睇法，果啲刻薄、唔理性、得勢不饒人既輿情，其實唔反映理性同敦厚既主流民情，關鍵係需要更多人企出來直斥呢啲荒唐行為，先可以扭轉「沉默的螺旋」。

套用激進反對派社民連既口號「不怕孤立，才可獨立」，唔想畀民主派一言堂既人，其實都應該學吓。

原圖：8825