不要再說是寒蟬效應!
不要再說是寒蟬效應!

「寒蟬效應」一詞最早源於英國思想家John Milton,佢喺《論出版自由》一書到,以「Chilling Effect」嚟形容人民怕受國家刑罰,唔敢就言論自由等議題發言;而佢嘅中文翻譯,就係來自成語「噤若寒蟬」。由最近《立場新聞》收檔,以至日前《眾新聞》宣告停運,不少人都提起「寒蟬效應」呢四個字,話當局「有意打壓」,甚至話《港區國法》對言論自由有影響。但囍雨想講,無論刑事法或《國安法》條文都好清晰,如果仲有媒體想打擦邊球,甚至係擺明踩界,「食得鹹魚抵得渴」,當然要自己承擔返個後果。《眾新聞》依家自己停運,又無人迫佢,關其他人咩事?


《眾新聞》自己都知道有問題?


《立場新聞》有咩問題,相信近日嘅警方記者會、新聞同評論文章,大家都睇咗好多,囍雨就唔再重覆講;至於《眾新聞》點解要「自行了斷」,正如《眾新聞》主筆楊健興都公開話,見到《立場》咁樣,《眾新聞》管理層都評估過,唔能夠排除過去嘅報道或文章都可能有風險。囍雨從字面上理解,似乎佢哋都覺得,自己之前刊登嘅嘢,可能都會有問題,所以先急急腳結束運作。


聲援違法抗爭 誤導性報道


《眾新聞》之前有唔少動作,例如整過「社運抗爭資料庫」,擺明係聲援違法抗爭、縱容暴力;而佢哋上個月初又同國安逃犯羅冠聰做專訪,到底係咩政治立場,大家都知得一清二楚。《眾新聞》係咪想用傳媒平台,為逃犯或犯罪分子做宣傳?有無涉嫌違法嘅元素?囍雨依家都唔敢下定論,就等執法部門去調查。但就算無講法律問題,作為傳媒人又點會唔知咁樣做,係好大爭議性,甚至係超出咗傳媒機構嘅角色?


如果大家有留意,《眾新聞》舊年仲出過誤導性報道,斷章取義咁歪曲政府官員嘅說話,老屈對方「拒保證23條唔會以言入罪」,最後保安局要發聲明表示深表遺憾。點解當時其他傳媒轉述官員說話都無出錯,點解唯獨《眾新聞》有問題?佢哋機構入面,有咁多資深傳媒人喺到工作,甚至部分人有法律背景,真係諗唔到點解會犯呢種錯,似乎最有可能嘅解釋,根本就係有意為之。《眾新聞》咁做,不獨影響成個傳媒行業,甚至可能影響埋公眾對新聞機構嘅信心。


《眾新聞》今次停運確實係幾突然。《立場》就話有高層被捕,資金被凍結,影響到機構運作。但係《眾新聞》又無被警方調,又無人被捕喎,囍雨都想知道,到底《眾新聞》管理層擔心啲咩呢?係咪見到《立場》被查,覺得自己同對方情況差唔多,驚一樣會中涉嫌「發布煽動刊物罪」,怕被國安處調查?如果機構一旦受查,除咗會被凍結資產,金錢流向將會無所遁形,到時邊個係金主、又為邊個服務緊,呢啲嘢都會清清楚楚。《眾新聞》選擇抽身離場,可能心中有鬼,亦想暫時保住啲資產,怕受查後渣都無埋。不過又咁講,新聞自由唔係擋箭牌,如果有傳媒機構涉嫌犯法,執法部門一樣唔會手軟。就算機構結束咗都好,涉案者一樣會上身,有啲人唔係咁天真,以為可以走得甩啩?


請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

16
好正
1
心心眼
8
好好笑
1
令人傷心
0
嬲爆

評論

  • +85298****49
    +85298****49
    4月前
    0 回應
    Excellent
    • 龙一吟
      龙一吟
      4月前
      0 回應
      哈!兩隻曱甴。
      • 龙一吟
        龙一吟
        4月前
        0 回應
        黑了不會變回白色!

        沒有更多評論

        沒有更多評論