今日係英國對BNO港人推出嘅LOTR移民計劃最後一日，據聞連日嚟都有港人把握「最後機會」，趕搭尾班飛機過英國。港人移民嘅故事，相信最近大家都睇咗唔少，甚至有傳媒報道，話部分移英港人其實毫無準備、辭咗份工、生活費都必有著落嘅情況下「瞌埋隻眼」買張機票就走人；甚至有人留低父母長者喺香港，自己就咁走咗去。囍雨無意評論咁嘅做法係啱定唔啱，因為喺佢哋嘅選擇嚟，但既然都做到咁盡、咁堅決要走。老實講，對住呢班人，囍雨認為係「勸都多餘」，與其挽留，不如歡送！

美國商會「信心認證」

港人移民嘅理由各不有不同，近期「最主流」嘅講法，係因為唔少人認為香港「變質」、擔心《港區國安法》或影響權利自由，所以要移民。對持有呢種諗法嘅人，囍雨認為真係勸都唔需要勸，因為就算同佢哋講幾多移民嘅風險同問題都好，呢班人都只會被當成耳邊風。

事實上，香港依家嘅情況根本就唔係呢班人諗到咁惡劣，唔信嘅人，請先睇睇香港美國商會點講先。美國政府早前「警告」美企在港營商或有風險，美國商會隨即發聲明講清楚，無會員因「警告」減少在港投資，仲讚香港嘅國際商業城市地位至關重要。無論要移民嘅人信唔信都好，外國商人嘅加持足以證明，香港環境同優勢仍舊不變。

商人從來都係最「誠實」，美國商人就更加「誠實」，如果香港法律保障唔到佢哋、法治、自由度不足，或者已經無晒商機，一早必定大規模拉隊走人，依家又唔見有喎！堅持移民去英國食塵班人又點解釋呢？

英國走下坡 香港再起飛

查實，香港咁多年來有咩風浪未見過？講起移民潮，香港以前都經歷過，歷史已經提供咗答案。由1984年中英談判至1997年回歸前夕，有人對不信任香港前景而移民；但熱潮過後，佢哋喺外國生活過、見到香港仍舊繁榮，咪又係由英國、加拿大等地回流返香港。時間會證明一切，只要移民嘅港人見到將來香港持續發展，相信一樣會選擇回流返港。

仲有仲有，過去一年香港新股集資額逾5千億元、港元市場持續錄得資金淨流入，呢啲財經數據反映投資者對香港嘅信心無絲毫動搖；加上國家「一帶一路」同「粵港澳大灣區」所帶嚟嘅發展機遇，前景一片光明。反觀依家英國經濟不振，舊年GDP萎縮9.9%，創311年來最差紀錄；失率率今年首季更達4.8％；仲有英國新冠疫情持續爆發，最近幾日每日新增三萬至五萬宗確診。香港人依家過到去，真係自求多福喇。

其實香港出現移民潮，對留喺香港嘅人嚟講，都可以話係一件好事。當年97前嘅移民潮，就有大批中高層人員離開，令低層員工有機會晉升「上位」。依家嘅情況都係一樣，只要大家對香港有信心，「上位」、發展機會多的是。與其喺外國捱騾仔、做「二等公民」，點解唔喺香港繼續發展？

原圖：中通社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk