重溫《生果報》喺去年五月底一則頭版報道或「廣告」（囍雨分唔清楚係報道定係其他）大字標題寫上「One HongKonger One Letter to SAVE HONG KONG」、「一人一信救香港」等字句，又附有「#TrumpSavesHK」、「Mr. President, please help us」等內容，唔駛囍雨解釋，大家都知道《生果報》係想尋求美國總統「干預」香港啦！所以，當日前警務處長鄧炳強公開話「呢個老闆所控制嘅媒體，不停用一啲誤導、炒作、不盡不實嘅報道，從而分化人心、從而挑起香港仇恨、對國家嘅仇恨」嘅時候，囍雨好想講句「不能同意更多」，如果無《生果報》喺過去近兩年時間「煽風點火」，相信香港喺反修例運動期間都唔會俾暴徒蹂躪得咁慘！

講事實 = 打壓？

對於鄧炳強一番話，《生果報》當然會全力回擊啦，例如《生果報》喺今日嘅報道，更引述記協聲明「譴責」鄧炳強抹黑傳媒，並引用其主席楊健興指「一個處長唔應該將坊間、網上嘅流傳，或者係佢口中嘅假新聞、假消息，但當成事實，作咁空泛嘅指控」；而《生果報》總編輯羅偉光，就指「作為執法部門首長發表針對傳媒的言論，是典型推卸責任的說法，認為傳媒挑起所謂仇恨、分化，令人質疑是否要畫更多紅線，日後更嚴厲打壓傳媒」云云。講咗咁耐，囍雨只想問一句，鄧炳強所講嘅，係咪事實呢？

根據囍雨理解，其實鄧炳強一番話，除咗話有傳媒老闆借控制嘅媒體搞分化、挑仇恨外，如果有人危害國家安全，就要為犯法行為付出代價，包括承擔法律責任。呢個說法，囍雨唔認為有問題！至於記協話指控「空泛」，囍雨想問，《生果報》公開叫外國干預香港，係咪事實？《生果報》經常煽動市民上街反政府甚至反中央，係咪事實？同樣重要嘅係，《生果報》有報道誤導市民，要警方去信百幾次澄清，又係唔係事實呢？依家係有媒體可能危害國家安全，難道記協覺得《生果報》種種行為，完全無問題？

若無犯法 何來打壓？

至於《生果報》總編輯嘅回應，包括質疑係咪「要畫更多紅線，日後更嚴厲打壓傳媒」，當中道理就更簡單，如果傳媒無犯法，無人可以「打壓」佢哋；相反，如果媒體包括佢哋嘅老闆涉嫌違法，警方就必須執法。《生果報》與其質疑將會被打壓，不如先顧及好傳媒道德，唔好諗住做「踩界嘢」仲好啦！成日話傳媒係「第四權」，囍雨想講，傳媒有監察政府嘅權利，但肯定無犯法同埋危害國家安全嘅「特權」！

圖片來源：中通社、RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk