出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
政客走得快 必定「有古怪」?
政客走得快 必定「有古怪」?

噚日,囍雨就講到公民黨前立法會議員郭榮鏗一邊講「落子無悔」,但另一邊廂就準備「走佬」加拿大;今日,囍雨又睇到另一單新聞,就係新民主同盟西貢區議員黎銘澤表明唔會宣誓,月底將會辭職,並會退出新民主同盟。反對派區議員唔宣誓、辭職,唔出奇,奇就奇在,有消息指黎銘澤上月初已經離港,外界盛傳佢係驚自己因為初選「落鑊」。如事情屬實,囍雨只能講句,反對派搞革命,唔係賭人頭,而係賭「口水」,實在太兒戲喇!

 

口講一套 做另一套?

 

據報,唔宣誓、會辭職嘅黎銘澤,就表示宣誓修例係明目張膽竊取2019年選舉結果,「明為宣誓,實為在每位民選議員頸上架起一把刀」,又指修例係打壓異己,作政治檢控,認為面對「極權打壓」,往往需要人說「不」,等後世知道「暴政」嘅惡劣,故此佢有此決定。講到大義凜然,事實係咪真係咁呢?

 

先講關於宣誓修例嘅問題,宣誓嘅精要,在於區議員要宣誓要效忠特區、擁護《基本法》,如果咁都有問題,囍雨又要不厭其煩地講多次,咁諸如黎銘澤之流,當初參選時點解要簽署要擁護《基本法》、效忠特區嘅相關聲明?即係簽字就得,用宣誓方式就唔得?點講都好似有矛盾!

 

怕被捕 就「走佬」?

 

據報,黎銘澤上月初已經離開香港,當中原因,就係外界盛傳佢早前參與初選,名列新界東初選名單之中,而且公開為其「黨友」范國威助選,范國威依家被捕還押,而黎銘澤就擔心「殺到埋身」,或成為下一批被捕人士,所以「率先」離港「保安全」。囍雨想問黎銘澤,到底佢係唔想宣誓所以辭職,定係驚自己觸犯《港區國安法》,所以「走佬」呢?

 

事實上,新民主同盟發過聲明,現時十幾位區議員大多數傾向宣誓,並尊重因個人原因而不宣誓嘅意願;囍雨覺得,其他新同盟嘅區議員大多數都宣誓,而黎銘澤辭職兼疑似「走佬」,更顯得事情「有古怪」!講真,如果係驚被捕所以辭職「走佬」,咁件事就明顯唔關宣誓事,黎銘澤不如從實招來,講下自己依家喺邊,如果唔喺香港,又點會「驚宣誓」驚到要走呢?或者,有人根本就係「畏罪逃去」,只係依家發表宣言「攞尾彩」!

 

如果驚有罪責,囍雨一直覺得最好嘅方法,就係唔好參加戴耀廷嘅「攬炒初選」,反對派搞革命,但如此膽怯,點做「大事」呢?反對派陣營喺反修例運動輸得一敗塗地,唔係無原因嘅。


圖片來源:黎銘澤社交網站專頁


請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

19
好正
2
心心眼
14
好好笑
1
令人傷心
4
嬲爆

評論

  • Happy21
    Happy21
    4週前
    0 回應
    :+1:
    • Happy21
      Happy21
      4週前
      0 回應
      :blush:
      • Happy21
        Happy21
        4週前
        0 回應
        Good

        沒有更多評論

        沒有更多評論