聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
612基金又乾塘?
612基金又乾塘?

自從前年黑暴爆發之後,坊間不同名目嘅眾籌湧現,有啲話要援助被捕示威者、有啲又話要籌錢打官司,不停咁叫大家捐錢,十足無底深潭咁。近期「612人道支援基金」(「612基金」)又「告急」,話上月基金結餘得返181萬元,但係1月預計開支就高達1,500萬元,所以呼籲大家捐錢。廣男記得,舊年5月「612基金」先「告急」過一次,既然基金好似咁唔掂,不如叫律師們「收平啲」,甚至做義務律師呢?接「612基金」案件嘅律師,佢哋又係咪收緊市價?

 

1.8億元捐款只餘下181萬?

 

根據「612基金」簡報顯示,佢哋上個月收到超過830萬元,但係同月開支同批出款項就有1,823萬元。一句講晒,就係入不敷支,已經接近乾塘嘅地步。至於「612基金」啲錢到底洗咗去邊?原來由前年6月基金成立至上月為止,總籌款額有1.8億元,而「法律費用資助」就係最大開支,累計花咗逾7,800萬元,而「緊急經濟支援或撫恤金」同「法援分擔費」總支出亦分別達2,290萬元同2,160萬元。廣男就咁睇盤數,基金已經洗咗過億元,到底大家仲要捐幾多、捐幾耐先夠?

 

財政緊拙還亂花錢?

 

正所謂「長貧難顧」,「612基金」成日話無錢、叫人捐錢,而佢本身開支又大,洗錢速度又快,叫人點樣持續「課金」畀基金?而且近期香港經濟麻麻,失業率又回升,唔係咁多人有閒錢可以捐出嚟嫁。既然「612基金」嘅錢去得快,有無諗過方法開源節流?點解唔公開呼籲律師提供義務法律服務?咁樣唔係最簡單直接咩?

 

廣男仲記得,舊年10月「612基金」基金信託人之一嘅吳靄儀,仲話想喺基金到撥1,500萬元搞「第二位大律師」資助計劃,畀獲法援嘅被告請多名年輕律師協助出庭,費用由基金資助。用市民捐款嚟幫律師「增加工作機會」,基金係唔係變咗法律界嘅「保就業」計劃?如果基金嘅財政咁緊絀,點解之前又要贊助攬炒派組織租集會用嘅音響、搞活動,用錢用得咁隨意?

 

最重要嘅係,「612基金」不斷支援涉嫌違法者,會否變相鼓勵或合理化違法行為?一個「基金」開宗名義支援黑暴運動被告都唔夠金錢支持,佢哋個「黃色圈」係咪已經瀕臨崩潰喇?

 

圖片來源:612基金Facebook


請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

9
好正
2
心心眼
8
好好笑
2
令人傷心
4
嬲爆

評論