戴耀廷叫人唔好「送頭」
戴耀廷叫人唔好「送頭」

攬炒派政客嘅一大特色,就係言行經常出現矛盾,不時玩「搬龍門」。好似民主黨政客咁,為咗延任立法會議員一時話政治判斷未必可以用民調解決,一時又話用民調作決定,最後又話番民調幫唔到手做決定所以做返「政治決定」,睇到人「眼都花」;今日,囍雨睇戴耀廷喺《生果報》登嘅一篇文章,內容竟然教人「唔送頭」,其實呢,戴耀廷由2013年年頭開始就煽動人「違法達義」,依家咁多人被警察拉咗甚至監都坐緊先叫人唔好「送頭」,係唔係玩人呀?


過萬人被捕 才叫人「不要被捕」?


老實講,由黑暴運動至今,已經有過萬人被拘捕,當中剩係學生,就已經有近4,000人被捕,如果戴耀廷由2013年開始就叫人唔好犯法或者抗爭,咁囍雨覺得佢叫人唔好「送頭」係無問題嘅;但戴耀廷作為「違法達義」嘅始作俑者,由違法佔領前就開始煽動人犯法,今時今日先叫人唔好「送頭」?咁囍雨想問下,錯信咗「違法達義」思想、已經「送咗頭」嘅人點算?咁多人因為政客「犧牲」咗,戴耀廷依家先叫人唔好「亂嚟」?遲咗好多喎!


另一個問題,戴耀廷喺文章佢嘅文章提到「西方自由世界已覺察不能讓中共繼續在國、內外伸展霸權。疫情已令中共陷進內外交困之局,大陸出現巨變,是一觸即發。關鍵時刻很可能在未來一至兩年出現」,言下之意,係咪又想講內地會出現變化,香港可以乘機爭取「自治」甚至成為「獨立國家」呢?戴耀廷呢番「分析」,囍雨先唔講佢會唔會有機會觸犯咩法律,其實佢呢番言論,似係想安慰啲支持者,叫啲支持者再忍下、再等下,攬炒派好快就會「機會到」。不過依家嘅客觀環境就係,黑暴運動已經完敗,老一輩攬炒派政客,收聲嘅收聲,收山嘅收山;新一代嘅攬炒派政客,有啲已經離開咗香港,戴耀廷仲想鬥,仲想「變天」?唔好呃人啦!


不斷灌輸「有希望」


包括戴耀廷在內嘅攬炒派陣營,近月都改變晒策略,唔叫人衝,而係話俾大家聽中國「被圍堵」,大家等下「有希望」等等,只不過,內地政局其實非常穩定,好多嘢都只係攬炒派政客為「氹」支持者而營造出嚟嘅大話。換個角度,如果抗爭落去真係有意思,大家認為戴耀廷會唔出嚟搞局咩?


其實,戴耀廷等人之所以「縮」得咁犀利,都係因為《港區國安法》立法,囍雨只能夠講,《港區國安法》真係好有震懾力,連本身「日日叫人抗爭」嘅戴耀廷,都轉晒軚叫人唔好「送頭」;只不過,囍雨要喺度提提戴耀廷,《港區國安法》除咗針對嚴重如恐怖活動嘅暴力行為,用支筆「分裂國家」一樣有罪,小心寫文、講嘢時「太興奮」,變咗「再次犯法」呀! 


圖片來源:中通社、RTHK


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk


19
好正
3
心心眼
10
好好笑
6
令人傷心
14
嬲爆

評論