聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
「一定要反國安法」?請李柱銘講清楚!
「一定要反國安法」?請李柱銘講清楚!

喺香港,大家都尊敬、信任醫生、律師、工程師…因為兩個字:專業。但有時候,專業兩個字,都可能係一把雙刃劍,完全視乎所謂嘅「專業人士」,安嘅係一副咩心腸。

 

「港區國安法」將至,廣男見到資深大律師排名第一嘅李柱銘,今日喺生果報又有篇文章,叫大家「一定要全力反對港版國安法」。點解有咁嘅論調呢?嗱,未免曲解李大狀嘅原意,廣男盡可能原文引述李柱銘嘅文字。

 

資深大狀的「推論」

 

按照李柱銘嘅論述,「阿爺」訂立國安法有兩大目的,首先係「藉今次港版國安法確立先例,直接為港立法」,而且「凌駕所有特區法律」,「一下子便完全推翻了《基本法》的原有安排」,以致日後可為港「制訂和解釋更多惡法」;而最大嘅目的,就係要喺香港「確立全面管治權」。李柱銘再推演落去,就話喺行政方面,中央喺特區政府架構上,加設咗國安公署呢個「太上皇機構」;喺立法方面要「奪取立法會獨有的立法權」;喺司法方面,國安公署嘅「管轄權」,日後都可能「變成奪取特區司法權的黑洞,甚至作『送中』安排」……

 

嘩!一個資深大律師講呢啲,驟眼睇落去,真係「會嚇你一跳」。廣男就話,依家法律條文都未公佈,無謂多拗;但有啲常識問題,就好值得大家商榷一下。

 

維護國安 至高無上

 

首先,如果廣男話,一個國家維護自己嘅國家安全,係至高無上嘅國家大事,相信李大狀都唔會反對吧。放眼全世界,美國如是、英國如是,「五眼聯盟」皆如是。李柱銘以至攬炒派唔係成日講「國際標準」咩?!同美國至少有廿條維護國家安全嘅法律、英國喺百年前就設立打擊分裂國家嘅專責機構相比,中央如今喺香港訂立一條「港區國安法」,又似乎真係「溫和」好多喎,唔知李柱銘又會唔會建議特區或者中央喺呢方面跟下「國際標準」呢?

 

另一個問題,有香港法律界人士就指出,「港區國安法」日後納入《基本法》附件三、喺香港正式實施之後,其實客觀效果,就係成為香港法律嘅一部分,喺咁嘅情形之下,廣男又真係唔明,點樣可以「一下子推翻嗮」《基本法》嘅原有安排呢?呢條法律,除咗堵塞香港維護國安嘅漏洞之外,又改變咗啲乜呢?「一國兩制」仍然係「一國兩制」、《基本法》依然係《基本法》、「高度自治、港人治港」更加無影響;再進一步,香港人嘅生活模式冇改變過、現有嘅一切合法權利自由,例如言論、集會、結社、選舉等等,亦都統統冇改變,李柱銘可以「推演」出咁多嘢,會唔會諗多咗呢?又有冇事實根據先?!

 

李柱銘此番代表民主黨嗎?

 

所以廣男真係好懷疑,李柱銘以至攬炒派依家講呢啲,係咪想趁住未有法律條文之前,不斷假設、想象,極盡能事喺港人心目中營造恐懼情緒啊?以前反一地兩檢、反《逃犯條例》修訂都係呢招,依家又嚟?!李柱銘叫人「一定要反」,究竟係立咩心腸,廣男留俾大家自己諗,但咁嘅意思,係咪等於想留空間俾人繼續搞「港獨」、繼續勾結外國勢力、分裂國家先?李柱銘講清楚啲好喎!仲有,李柱銘作為民主黨創黨元老,依家係咪代表成個民主黨反對「港區國安法」先?又係要講清楚先好喎!


請Follow我們的YouTube頻道:

https://bit.ly/2kgU8qg

 

下載我們的手機應用程式,收看第一手精彩內容:

https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

22
嬲爆
3
唔係呀哇
4
驚訝

評論

  • chan_ck3
    chan_ck3
    2月前
    0 回應
    今天的民主黨已經完全變質, 不用多說, 他們不民主, 不能代表香港民間, 所有人....是所有人只是嘩眾取寵的垃圾

    沒有更多評論

    沒有更多評論