自修例風波發生以嚟，明顯有跡象顯示幕後有一班別有用心者，由此至終都唔想暴力衝突、對抗嘅局面停落嚟。之前就用各種根本已經同修例無關嘅藉口製造遊行示威、繼而演變成暴力衝擊；眼見警方近期屢屢示威向遊行發出「反對通知書」，有人就開始改變「招數」，企圖製造一個又一個假新聞、假故事及謠言，然後通過網絡嘅力量散播反政府、仇警情緒，從而煽動「抗爭者」上街、不斷掀起連場惡戰。就好似剛剛過去嘅週末，明明民陣已經宣布取消遊行，但係偏偏就有一班人搵藉口上街搞事，結果就又為香港帶嚟一場浩劫。廣男喺度必須要勸大家一句，唔好偏聽偏信、人云亦云，時至今日必須堅定同暴力割席，更要嚴斥暴力。

不斷挑動仇警情緒

大家可以留意下，一個足以鼓動人走上街頭嘅「故事、新聞」，總會具備「夠震撼、夠悲情，能夠營造警察濫暴」嘅特點。例如8.31太子站一役之後，就有人喺網上聲稱「警察打死人」，甚至講到似層層咁話警方要「封站善後」，但事後有媒體就影到果位「被死亡」嘅示威者被警方拘捕、自己行出地鐵站嘅畫面；又例如，果兩位對住鏡頭呼天搶地之餘，都不忘以黑口罩遮面嘅男女，亦都一度成為「速龍無差別打人」嘅「經典例證」，但佢哋嘅來不及換嘅下半身示威者裝束都成為大疑點。

再將時間推遠啲，當之前警方承認派出臥底喬裝示威者執行任務之後，網上好快就流傳出好多「警察故意挑起衝擊」嘅故事，例如一個正在投擲燃燒彈嘅暴徒，因為「腰間有槍」，就成為咗「臥底嫁禍示威者」嘅鐵證，但原來之後有相片明確顯示，呢位「臥底」正在為支槍裝入BB彈（亦可能係鋼珠彈），試問大家有冇見過警察裝備有裝BB彈嘅真槍呢？除此之外，廣男仲見過更加離奇嘅「新聞」，就係用一條泰國醫院嘅網片，渲染「警察喺瑪麗醫院打人」。

停一停 諗一諗 要割席！

廣男所講嘅例子，依家睇嚟就好似笑話，但大家又千祈唔好低估呢啲「笑話」嘅殺傷力。就好似「太子站打死人」咁，好多人就係聽咗、信咗「有抗爭者犧牲」嘅故事，結果噚晚就又喺太子、旺角一帶爆發衝突。所以廣男想提醒大家，現時面對海量嘅媒體資訊時，好多時候都需要停一停、諗一諗，問一句「係咪合理呢」，然後加以多方求證。廣男覺得，係時下咁嘅環境，如果失去咗明辨是非嘅清醒頭腦，久而久之大家可能就會對假故事、假新聞失去免疫力，慢慢接受咗、甚至習慣咗，然後受其利用。

大家唔好忘記，越係當民意期望暴亂停止之時，越會有別有用心者見縫插針、搵藉口不斷挑起紛爭，製造對立。廣男請大家睇清楚依家嘅局勢，香港實在唔可以再繼續亂落去，廣大市民都喺時候企出嚟、堅定向暴力Say No！向暴徒Say No！呢個家，大家都有份！

原圖：社交網站圖片