「打垮」警隊 勝利在望?
「打垮」警隊 勝利在望?

經過近日嘅連串衝突,除咗社會元氣有損之外,唔少執法人員都疲於奔命,不過囍雨見到一個現象,就係警察每次清場嘅速度比之前快,拘捕涉事人數亦比以前多,可以話警察其實已經掌握到一班示威者甚或暴徒嘅「玩法」,唔再好似以前咁,要拖拉好耐先恢復到社會秩序。喺呢個社會亟需警隊有效執法嘅時候,囍雨有朋友同我分享一啲網上留言,有網民稱「其實警察唔會贏」、「勝利已經在望」等等,睇到呢啲Post,囍雨實在好奇,如果警察或者政府已經「無計可施」,點解一班示威者甚至暴徒,近日嘅行動無不敗退收場呢?

 

警察唔會贏?

 

近日睇到啲網上論壇嘅Post,囍雨唔知果啲Post係「認真分析」定係想喺「次次敗退」嘅情況底下維持士氣,有啲揚言「警察唔會贏」,因為清場只會令俾示威者準備下一場運動「進化嘅本錢」,稱「堅持就是勝利」;有啲直頭話自己「勝利在望」,大抵因為政府、警方嘅招數已經應付唔到源源不絕嘅示威者;有啲就話政府已經「無招出」,瀕臨崩潰云云。對於呢啲觀點,大家有咩睇法?

 

囍雨雖然唔喺呢啲衝突現場,無「親身感受」戰況,但囍雨呢幾日一直透過電視直播睇呢啲衝突,觀察到一個現象,就係警察推進、驅趕、清場甚至係拘捕嘅速度,似乎都比以往幾次快。以7.1衝擊立法會為基準,7.1當日一班暴徒下午開始攻入立法會,警察且守且退,記憶中要零晨時分左右先開始清到場;到上周六嘅所謂「光復元朗」行動,啲示威者大約下午三、四時開始喺元朗一帶滋事,其實入夜無耐,基本上絕大部分示威者已經俾警察驅趕到近住Yoho Mall嘅元朗西鐵站一帶,之後甚至將啲示威者驅趕晒上元朗西鐵站。如果講到啲示威者「咁有貨」,而啲警察咁「無計」,咁應該係調番轉,啲示威者不斷擴大範圍,甚至令到警察做唔到嘢先啱喎!

 

再違法 下場是被捕

 

除咗唔認同個別網民大言不慚嘅所謂「分析」外,囍雨仲喺度諗,事件升溫到呢個地步,當個別網民仲喺度叫人為下場運動「做準備」、催淚彈都阻唔到佢哋嘅時候,其實會唔會有人煽惑緊其他人「繼續」犯罪呢?噚日國務院港澳辦表明支持警隊嚴正執法,呢班網民或者示威者如果堅決要「玩落去」,最可能嘅結果就係俾人拉! 


原圖:文匯報

 

4
唔係呀哇
4
超無奈
1
無意見

評論