佔領中環，蓄勢待發？的確係！根據「佔中」發起人陳健民既講法，佢哋尋日特登走出來，就係講明好快會公布佔領中環既詳情。可能大家會話，「唓，佢哋講『佔中』都講咗近兩年啦，有咩特別啫？」無錯，就咁純粹講佔領中環真係講到好悶，不過最近陳健民一篇叫做《圍觀的力量》既文章，就好有趣！內文竟然叫人唔佔領中環都去「圍觀」下，廣男覺得呢個說法係世紀大騙局！
 
原本講好既一萬人佔領中環，用「核彈」炸中環，而家就話「數以千計」既人參與佔領中環，咁代表咩？代表佢哋搵唔夠人佔領中環囉，要用其他方法令到更多人參加呢個派對，等人數好睇啲！如果叫人違法抗命此路不通，叫人圍觀「支援」抗命行動，對「佔中」三子嚟講，都不失為一個充撐場面既好方法。
 
不過，市民既眼睛係雪亮既，明眼人一睇，就知道「圍觀佔中」，擺到明係「佔中」三子無計可施，唯有將唔想犯法既人都拉落水既詭計啦！文章出咗街兩、三日，輿論完全無反應，用一句網民好鍾意用既俗語，就係「膠都懶得派」。
 
所謂「合法聲援佔中」，叫市民喺側邊打氣叫口號，幫手運下物資，其實係靠害。試問，如果警察要清場拉人，佢點樣分企喺度果個人究竟係打緊氣、運緊物資定真係「佔中」呢？答案係根本分唔到，警察拉埋所謂「圍觀」、「合法聲援」既人，真係好難避免！
 
講到尾，佔領中環行動始終唔係民心所向，而家佔領中環聲勢唔大，「佔中」三子就用「圍觀佔中」、「合法聲援」既方式氹人參加，仲要聲稱「圍觀」可以改變命運。廣男覺得，就算一心要佔領中環都好，都要尊重唔想「佔中」既人；同埋用唔會犯法、「合法聲援」佔領中環去誤導人，萬一有市民出事，「佔中」三子又於心何忍呢？
 
原圖：takungpao