出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
請願變宣「獨」?
請願變宣「獨」?

有網民同示威者今日發起所謂「馬拉松式」請願行動,到參與G20峰會嘅19個國家駐港總領事館遞交請願信,話要促請各國喺峰會上向國家主席習近平「施壓」。囍雨睇新聞報道,發現咗一個幾「奇特」嘅現象,就係喺請願人士當中,不乏「獨」派人物包括梁頌恆、劉穎匡同曾焯文等,請願人士中又有人穿上印有「Liberate Hong Kong」(解放香港)字眼嘅上衣,甚至有人手持「Free Hong Kong from China Colonization」(從「中國殖民」解放香港)嘅標語,「港獨」味道甚濃。到底係請願被個別「獨」派人物騎劫咗,定係班人真係去唔同國家嘅領事館爭取「港獨」呢?

 

請願反修例 變要「解放香港」

 

示威者要喺G20前到各國總領事館請願,目的當然係想各國喺G20峰會上,向國家主席習近平提出關於香港嘅問題,包括《逃犯條例》修訂問題,甚至係要唔告6.12暴力衝突而被捕嘅示威者;佢哋嘅計劃會唔會成功,依然有待觀察,但喺反修例、撐示威嘅請願,變成有人叫「Liberate Hong Kong」、「Free Hong Kong from China Colonization」,好似變咗「港獨」派請願咁喎!

 

對於「港獨」派現身請願仲要高調地以英文宣示唔同標語,囍雨覺得有兩大可能。第一,就係呢個請願行動,除咗講關於《逃犯條例》等問題外,根本就係一個「港獨」派嘅活動;第二個可能,就係大部分嘅示威者其實只係想就修例、示威者被捕等問題向各國請願,但請願行動不幸地俾個別「港獨」派騎劫咗,變成叫外國「解放香港」。

 

無論係前者抑或後者,媒體以至其他市民看在眼裡,都會覺得有「港獨」派叫外國協助香港「爭取獨立」,囍雨覺得呢個請願行動,客觀效果上已經明顯變質,班「港獨」派借機生事,絕對係別有用心;就好似「獨」派人物陳浩天借G20峰會連同其他地方嘅「獨」派去日本大阪請願一樣,都係「掛羊頭賣狗肉」,搞分裂中國。如果一班示威人士唔想「被代表」,唔想俾「獨」派騎劫請願,真係要講清講楚!

 

為何要求外國干預

 

另一個重要問題,就係是否修例,甚至起唔起訴6.12示威者也好,呢啲全部都係中國、香港嘅內部事務,班示威者想搵外國向中國施壓,再叫港府唔好告啲涉嫌違法嘅人,唔係引入外國勢力咩?仲有喎,佢哋平時成日叫中央唔好理香港啲嘢,依家又想叫外國向中央施壓令中央介入香港,兩者唔係好矛盾咩? 香港人一定要睇清楚,所有集會遊行背後的目的,切勿人云亦云,更要與港獨及暴力行為劃清界線,否則儘管有何等祟高正義的理想,亦必定會被社會大眾唾棄。


原圖:RTHK

  

2
支持
2
好正
1
無意見

評論