盲反派為咗自己嘅政治利益可以去到幾盡？咪就係有理無理，都攻訐對手囉！廣男今日睇報道話，民陣嚟緊搞嘅七一遊行，因為一早有非牟利團體book咗維園，令到佢哋可能冇得由維園足球場起步，民陣就大鬧對方「執意霸場阻遊行，損人不利己」，仲要呼籲市民到時「用自己嘅方法包圍維園」。嘩！咁都得？維園嘅足球場畀你搞遊行起步就得，其他人申請嚟用就係「霸」？呢個係咩道理？民陣究竟有冇搞清楚，維園係屬於邊個㗎？廣男想講，維園唔會係民陣「私家用地」囉！

根據媒體報道，香港各界慶典委員會聯同香港匯演藝能發展中心，申請咗6月29日至7月1日，一連三日喺維園足球場舉行大灣區節，包括音樂、電競、籃球賽等；雖然民陣都申請咗搞遊行，但按程序，慶委會係非牟利團體，有優先租用權，所以未能接受民陣嘅申請。但民陣召集人岑子杰就批評慶委會連續第三年用維園場地係有意想阻遊行，係「用慈善（非牟利）團體之名，政治打壓為實」；佢又呼籲市民當日「包圍維園」，聲稱要「重演2003年7.1建制派佔用足球場、被50萬上街市民包圍嘅歷史」云云。

非牟利團體唔可以有優先權？

廣男想講，維園作為政府場地，優先畀非牟利團體租用，有咩問題先？幾時有過一條例，話維園嘅足球場淨係可以搞遊行，而唔可以用嚟慶回歸或者搞其他慶祝活動呢？廣男明白，遊行人士有表達訴求嘅權利，但同樣地，其他市民大眾亦都有去維園參加慶典、文化活動嘅權利，如果民陣咁都要批評、甚至因為自己冇得用就要發動包圍，明顯就係將自己嘅權利凌駕於其他市民正常生活、娛樂嘅「惡霸」行為，所謂「損人不利己」，正正係民陣自己。

煽動包圍反制 想趁機搞事？

廣男喺度仲特別要提醒大家留意，當民陣召集人講到要「重演2003年7.1建制派佔用足球場、被50萬上街市民包圍嘅歷史」，究竟意欲何為呢？佢哋發起嘅所謂遊行，根本係想趁機搞事、抑或另有所圖呢？大家試諗下，當呢班人下下覺得自己利益受損就煽動包圍、「叫人衝」，其實正正反映咗佢哋認為「搞對抗就可以解決問題」嘅態度，而更加可怕嘅係，佢哋咁搞法，根本係為咗自己嘅利益，其他人享有嘅正常權利，佢哋一概唔關心！

圖片來源：網絡