聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
胡志偉玩轉移視線
胡志偉玩轉移視線

民主黨主席、立法會議員胡志偉喺立法會用極具侮辱、甚至有咒罵成分嘅言論辱罵特首林鄭月娥,引嚟各界猛烈批評,有公務員組織要求佢道歉,亦有婦女組織向平機會投訴,但備受批評嘅胡志偉依然「唔知衰」,喺電台節目話自己講嘅嘢「恰如其分」,日前仲喺報章撰文,話自己因為批評林鄭月娥「只有黨性、沒有人性」而被批評。胡志偉呀、胡志偉,你幾時變得咁無賴?你理應清楚知道自己係因為乜嘢而受盡批評,政治攻訐雖然亦唔啱,但大家已經冇晒感覺,你受人批評,全因為講啲具侮辱性兼人身攻擊嘅說話去侮辱政敵,行為極之無品,好心你唔好扮唔知啦!拜託!


顧左右而言他的黨主席


日前,胡志偉以〈愛黨甚於愛民的特首〉為題撰文,話自己喺立法會質疑林鄭月娥「只有黨性、沒有人性,引來了土共的批評,指立法會不容反黨的言論」,講到自己係因為「反黨」而畀人鬧咁;但稍為有記性嘅人都會知道,胡志偉之所以畀人批評,係因為佢侮辱、人身攻擊甚至咒罵林鄭月娥,佢講到自己因為「其他原因」而被批評咁,根本就係轉移視線,想搏人唔記得佢嘅粗暴無禮。


老實講,胡志偉一向畀人比較斯文、溫和嘅感覺,唔理佢今次侮辱林鄭月娥係一時衝動定「處心積慮」,佢最應該做嘅,唔係喺度轉移視線,而係應該向林鄭月娥以至公眾道歉,承認自己當時說話唔恰當,冒犯咗林鄭月娥,亦令到民主黨形象受損;如果胡志偉仲覺得自己當時一番說話係「恰如其分」,其實係咪想話畀人聽,「民主黨出言不遜、侮辱他人」係「正常」嘅呢?所謂人有人格、黨有黨格,難怪民主黨近年醜聞不斷,黨員犯法、涉嫌犯法或者涉及傷風敗德之事不斷發生啦!


Fact Check民主黨


另一方面,胡志偉喺文章引述林鄭月娥稱「回歸前通過的《逃犯條例》不適用於內地並非刻意安排」嘅講法畀市民Fact Check,意指林鄭月娥講法有誤;胡志偉講開Fact Check,廣男又想講,佢哋嘅前黨主席何俊仁曾經喺立法會(當時應為立法局)講過,「希望條例草案能夠成為一個好的借鏡藍本讓中國政府考慮,以便日後訂定香港與中國內地之間逃犯移交的政策和法律」,大家應該問下民主黨或者胡志偉,當年民主黨要求嘅法律保障,今次《逃犯條例》修訂幾乎都滿足到,點解今日民主黨要反對條例修訂呢?係咪民主黨今日為咗反內地、反中央,連道理、法理都唔講喇? 


原圖:RTHK

10
嬲爆
0
驚訝
0
無意見

評論