同「台獨」合作 反對修例移交逃犯?
同「台獨」合作 反對修例移交逃犯?

一對香港小情侶舊年去台灣旅行,但男方懷疑殺害女方之後潛逃番香港,事件震驚港台兩地,礙於香港同台灣無簽署移交逃犯嘅長期安排,所以港台兩地想將個殺人疑犯移交到台灣受審都唔得;本來政府想修例堵塞漏洞係應有之義,但係盲反派就大力反對,其中「香港眾志」黃之鋒仲接受台灣媒體訪問,講到修例會令到台灣人嚟香港都會被捕、被移交咁款,仲要有「台獨」人士配合黃之鋒,喺台灣立法院質問官員。廣男想講,盲反派為咗阻止修例,竟然同「台獨」勢力合流,一齊嚇台灣人,為咗政治,呢班人真係去到幾盡都得!


台立委與黃之鋒互相呼應


早前「香港眾志」黃之鋒接受台灣媒體訪問,揚言修例會影響埋台灣人,講到台灣人上網同人「罵戰」,嚟香港果時都有可能被捕甚至被移交番內地;之後鼓吹「台獨」嘅「時代力量」立委徐永明,就喺台灣立法院向法務部長提出質疑,話今次修例唔係香港同內地之間嘅事,仲會影響上百萬到香港旅遊同過境嘅台灣人云云。據傳媒報道,「自決派」議員朱凱迪之後又喺社交媒體呼應番徐永明,話希望台灣政界深入了解修例影響,同港人「聯手反對」咁話。


對於朱凱迪、黃之鋒同「台獨」人士「裡應外合」,想聯手一齊阻止特區政府修例,叫台灣方面「小心」,廣男只能講句,佢哋根本就係靠嚇!如果台灣人無到內地兼且犯法,點可能好似黃之鋒之前所講上網同人鬧架所以到香港果時被捕呢?佢哋唔單止係侮辱緊香港政府,更侮辱咗會做把關、審視案件嘅香港法庭。朱、黃刻意喺港台兩地挑動矛盾,根本就係「反中」反上腦!


朱凱迪、黃之鋒迴避的問題


另一個問題,廣男覺得朱凱迪同黃之鋒等盲反派都無答到一個問題,就係如果有人喺內地違法,例如涉嫌謀殺、縱火等等,係咪又要因為盲反派嘅「政治考慮」,所以唔應該修例堵塞呢個大漏洞或者缺口呢?朱凱迪、黃之鋒等人所關心嘅,始終都係「政治犯」,佢哋唔相信香港嘅法庭,唔緊要,但佢哋明知而家有個法治缺口而想政府「視而不見」,呢啲所謂從政者,諗嘅似乎唔係為社會福祉,而只係政治行先。


原圖:Takungpao

3
嬲爆
5
驚訝
2
超無奈
1
無意見

評論