前幾日一班「港獨」派喺港大搞咗個旺角暴動三週年集會，期間有女記者自稱受到暴力對待同惡言驅趕，位女記者事後話呢班「港獨」派嘅暴力潛意識，連一個拍直播嘅傳媒女人都可以咁對待，質疑點解港大又容許佢哋公開「宣獨」。囍雨覺得非常奇怪，呢班「港獨」派，唔係要爭取自由、民主甚至「獨立」嘅香港嘅咩？難道佢哋嘅「信仰」，其實就係打擊新聞自由、「狙擊」同自己政見唔同嘅人？如果香港係由呢班人話事，恐怕香港只會變成暴亂之都！

根本就不尊重自由

一班「港獨」派公然喺香港嘅大學搞所謂紀念旺暴集會，開口埋口稱呼一班暴徒為「義士」，本身經已相當有問題；現場有記者採訪，呢班「港獨」友因為覺得人哋係「藍絲帶」或者「親建制」而瘋狂「追擊」人，又爆粗又推撞，問題就更加嚴重。首先，乜香港唔係講新聞自由嘅咩？係咪傳媒同佢哋「港獨」理念唔一致，就可以辱罵甚至推撞人，佢哋嘅所謂民主、自由，根本就只係「口號」，如果連一個女士嘅採訪自由都唔尊重，呢班人講到自己理念有幾崇高，根本都只係廢話！

再者，發生記者被「港獨」派「追擊」，囍雨仲想問下，點解素來喜愛為記者發聲嘅記協，到底喺邊呢？呢個記者組織所捍衛嘅傳媒人利益，係咪只包括盲反派同本土派媒體，而其他媒體以至媒體記者嘅權益，就唔需要被保護？囍雨就覺得，任何傳媒人都應該享有新聞自由，就算個別媒體嘅立場同盲反派唔一致，佢哋嘅權利都應該受到保護，呢啲先係平等嘅自由；記協如果真係堅守新聞自由，根本就冇理由唔譴責呢班「港獨」份子。

公開宣「獨」 言論猖獗

綜觀呢個「港獨」派集會，囍雨唔明白點解一個由政府資助營運嘅公立大學，可以容許一班「港獨」份子喺度公開宣揚「港獨」思想呢？例如前中大學生會會長周竪峰，可以口出狂言叫「港獨」人士「繼續努力」，等待內地經濟崩潰；而被DQ嘅前議員梁頌恆，用「義士」形容旺角暴動暴徒之餘，仲話希望「抗爭」成功，呢個集會唔需要再搞落去。睇完呢啲出自「港獨」份子嘅說話，大家真係要問一句，乜而家公開宣揚「港獨」，係可以咁明顯，仲可以咁猖獗嘅？

旺角暴動發生三年，表面上呢幾年再冇大型嘅違法、暴力行動，但囍雨希望大家警剔，當越嚟越多青年畀「港獨」派所荼毒，社會隨時都有可能再出現暴力流血事件，而大家身邊嘅年輕人，亦隨時有可能成為暴動「爛頭卒」。喺新一年，囍雨除咗祝願大家身體健康、心想事成之外，亦要囑咐大家一句，要「豬」事小心！

原圖：《港人講地》