盲反派為「紀念」DQ事件一週年，日前就搞咗個集會，點知人數寥寥無幾，得果幾十人出席，場面冷清之餘，仲畀人揶揄佢哋根本得唔到普羅市民支持；值得留意嘅，係被DQ嘅劉小麗喺集會時話自己無論係咩崗位，都要為盲反派喺補選贏番一席，如此「豪情壯語」，實在有「霸氣」。不過「有人歡笑有人愁」，呢邊廂劉小麗勢被捧為九龍西補選「代表」嘅同時，一向被人無視嘅盲反派老將馮檢基竟然已經間接被盲反派「自己友」永久「DQ」，真係非常慘情！早知今日，何必當初呢！

民主派「假民主」！

日前馮檢基宣布退出民協，外界似乎唔係太關心佢做乜要退黨，傳媒焦點都集中喺馮檢基仲會唔會參選嘅問題；馮檢基本人就話佢之前講過「最後一戰」，只係話代表民協嘅最後一戰，被問到會唔會參加11月立法會九龍西補選嘅時候，佢話「不會說不」。廣男喺網上面見到，有唔少網民都話馮檢基𠝹票、幫建制等等，大家真係要問下盲反派或者佢哋嘅支持者一句，佢哋咁樣施壓，算唔算係永久「DQ」馮檢基，唔畀佢再參選先？

有部份盲反派支持者之所以咁憎馮檢基，多多少少都係因為馮檢基之前堅持自己係上次立法會九龍西補選嘅Plan B，令盲反派主流以至本土派認為佢「阻住地球轉」，最後迫佢退出Plan B。但係，馮檢基乃係經過盲反派初選程序而確立嘅Plan B人選，當時係盲反派主流人物諸如鄭宇碩、本土派朱凱迪迫佢退出，馮檢基可以話係受害者先啱。而家馮檢基都未話自己會再參選，盲反派支持者就「打定先」，用壓力唔畀陣營中人參選，根本就一啲就唔民主，甚至可以話係「假民主」！

永久「DQ」馮檢基？

可以預見得到，如果馮檢基參加嚟緊11月嘅立法會九龍西補選，到時盲反派支持者就一定會指責佢𠝹劉小麗或者李卓人等人嘅票；好喇，如果馮檢基參加2020年嘅立法會換屆選舉又如何呢？廣男相信，盲反派一樣會話馮檢基係收咗錢出嚟𠝹盲反派其他「被認可」人士嘅選票。換句話說，盲反派應該唔係唔畀馮檢基參加補選咁簡單，而係要永久「DQ」馮檢基，但馮檢基作為一個香港公民，無論佢屬於溫和盲反派抑或激進派，佢都應該享有參選權先啱咩？盲反派成日自稱為「民主派」，但從佢喺唔同選舉都欽點某啲人而封殺其他人嘅表現，說穿了，呢班所謂「民主派」，喺政治利益面前，都係「假民主、真獨裁」喇！

原圖：Takungpao