因為拒絕／忽略法定誓詞而被DQ嘅前立法會議員劉小麗，噚日宣布唔會就自己DQ案上訴，話自己未決定會唔會參與補選，但又同時推薦工黨李卓人作為後備。對於劉小麗決定唔上訴，可以話係意料中事，因為呢個對佢嚟講，係最慳錢嘅做法，對於視錢如命嘅佢而言，可以話係最合乎「經濟效益」。問題係，佢哋之前為咗DQ案上訴而用咗「守護公義基金」名義籌款，咁到底而家啲錢又點用呢？唔通無啦啦又拎咗去畀佔領三人組打官司？喂，市民捐錢嘅時候，目的應該唔係咁架喎！

「基金」不斷搬龍門

根據傳媒報道，「守護公義基金」發言人鄭宇碩話「基金」目前籌咗1,140多萬元，用咗450萬元，主要都用咗喺DQ案初審費用、律師費等，咁剩番果579萬元又如何呢？鄭宇碩就話要喺將來用喺被告緊「公眾妨擾」罪果九個違法佔領被告身上。問題嚟喇，廣男睇番之前嘅一啲資料，呢個所謂「守護公義基金」喺前年年尾成立，當時發起人陳健民、朱耀明等人講明要「用公民力量守護公義、對抗DQ」，但一段時間之後就無啦啦變咗支援埋違法「佔中」九名被告，大家話咁做合唔合理？

其實個邏輯好簡單，我就算唔滿意DQ都好，但唔代表我認同「走數」唔肯認罪嘅佔領三人組，明明完全係兩件事，呢個噚日鄭宇碩竟然代我決定埋啲錢點用，你話係唔係過份先？再講得白一啲，呢個「基金」開初講明籌錢係用喺DQ案上面，而家未得捐款人同意下就變咗支援「佔中」人士，呢個仲唔係欺騙？呢一筆「糊塗帳」，廣男覺得劉小麗本人點都必須公開清楚交代，否則就脫不了「呃錢」嘅嫌疑！

劉小麗：共同開創民主自決之路

講返劉小麗，佢噚日宣布唔上訴，但就冇表示會參加補選，剩係推薦其他人做「後備」，話佢唔係想鋪路參加補選都冇人信；但問題係，劉小麗之前喺立法會宣誓果時，公開講明要喺「黑暗中尋找希望，共同開創民主自決之路」，先唔講咁樣等同搞變奏式「港獨」，鼓吹「民主自決」本身已經唔合《基本法》規定，如果劉小麗冇放棄呢個主張，廣男真係懷疑佢有冇參加補選嘅資格。當然，呢個問題到真係發生時就留畀選舉主任去處理啦，但廣男就覺得，明知「民主自決」理念及主張違反《基本法》，亦唔合乎中國憲法，如果持呢份主張嘅人都可以做由《基本法》賦權成立嘅立法會，咁咪變相鼓吹呢類人用公帑去宣揚違法違憲理念囉？

原圖：Takungpao