熱血公民立法會議員鄭松泰因為倒插國旗、區旗被起訴而罪成，建制派對於擺明唔尊重國旗、區旗仲要毫無悔意嘅「泰博」，梗係要提出譴責啦；不過喺其他盲反派議員嘅包庇之下，讉責鄭松泰嘅議案最終都係通過唔到，據報鄭松泰事後仲要死撐，話如果再有機會嚟多次，唔會「踩界」而係會直接「犯咗佢」（侮辱國旗、區旗罪），好一副「你吹我唔脹」嘅樣子！

盲反派包庇乃意料中事

老實講，之前囍雨都已經講過，盲反派為咗反政府陣營嘅議席，基本上佢哋就算明知鄭松泰有錯、幫咗都唔會多謝佢哋，佢哋都一定會包庇到底，例如近期捲入許智峯「搶劫案」嘅民主黨，佢嘅主席胡志偉就話要鄭松泰失去議席係「超出比例」，會計界議員梁繼昌就話鄭松泰行為雖然不適當兼無聊幼稚，但「未至於」要佢喪失議員資格。一句講晒，就算鄭松泰有錯兼被定罪，總知盲反派覺得「罪不致死」，就唔可以DQ佢哋啲自己友啦！

對於鄭松泰係咪要被DQ，囍雨相信唔同人會有唔同想法，例如盲反派支持覺得完全唔駛DQ佢，建制派支持者會覺得佢連國旗、區旗都唔尊重，根本無資格做議員。囍雨就覺得，鄭松泰有錯就梗架喇，DQ佢與否，其實都睇鄭松泰有冇悔意，但如果佢仲要話嚟多次、會直接啲犯法，完全無覺得自己有錯，仲要講到咁囂張，真係好難唔讉責佢喎。

盲撐鄭松泰 盲反派有「後著」

其實今次盲反派包庇鄭松泰，或者唔係純粹支持鄭松泰咁簡單，當盲反派異口同聲話鄭松泰「罪不致死」嘅時候，大家再諗番之前胡志偉都講過現階段睇證據未至於要令許智峯受譴責、失去議席，咁有一個可能情況，就係日後許智峯就算真係被判有罪，盲反派一樣可以再講多次「罪不致死」，唔駛DQ許智峯呀話？但問題又嚟喇，如果犯咗法兼被判有罪嘅立法會議員都唔駛DQ，咁大家就要問下盲反派，到底犯咗咩事先要DQ呢？盲反派條「線」又Set喺邊度先？ 

原圖：Takungpao