窮途末路民主黨 靠做老千「昆人水」?
窮途末路民主黨 靠做老千「昆人水」?

一單許智峯「強搶」女政府人員手機案,令本來已經江河日下、影響力大不如前嘅民主黨「雪上加霜」,但「死唔斷氣」嘅民主黨疑似為咗轉移視線,不惜為開個無料到嘅「天下為公」眾籌搞記者會,繼續人格謀殺前特首梁振英。其實之前囍雨已經寫過,呢個極有可能係呃市民錢嘅「天仙局」,因為民主黨要眾籌畀律師費,而佢哋嘅法律顧問包括何俊仁、何俊麒兄弟有份嘅「何謝韋律師事務所」(前者係民主黨前主席,後者係民主黨前區議員);點知真係畀囍雨一語成讖,喺林卓廷佢哋份最新文件,寫明拍檔包括何俊仁、何俊麒律師。咁搞法,唔應該只係話民主黨搞「天仙局」,而係掠市民水嘅「老千局」先啱?同埋如果民主黨或者林卓廷咁「正義」,點解唔組織番個「真‧天下為公」行動,查下許智峯搶個女仔手機入廁所做乜呢?

何俊仁做法律顧問 早疑利益輸送

其實,之前囍雨睇到民主黨何俊仁、何俊麒間律師事務所有份就「天下為公」畀法律意見,已經寫文質疑過民主黨會唔會籌完錢之後,最後會畀番啲錢何俊仁佢哋賺,結果真係畀囍雨估中咗。根據一位行內人士傳畀囍雨嘅文件,民主黨直頭明目張膽喺文件寫明拍檔(Partners)包括何俊仁、何俊麒同文浩正三位律師,何俊仁喺面對傳媒嘅時候,仲講到明「向計劃發起人表示若其律師樓繼續要為計劃提供專業服務,會徵收相關費用」;咁講法,係咪即係承認民主黨搞政治騷之餘,仲要畀何俊仁、何俊麒呢兩個「自己友」賺錢呢?

嗱,囍雨唔敢講話何俊仁、何俊麒一定有收錢,或者佢哋將來一定會收錢,不過可能性就好好好好大囉!若然係真,呢個就係不折不扣「利益輸送」,囍雨喺呢度要問民主黨幾個問題,第一就係林卓廷話就「天下為公」一事,要搵英國同澳洲律師報價,咁搵香港律師,例如何俊仁、何俊麒嘅「何謝韋律師事務所」做嘢,係咪都要報價呢?如果冇,點解何俊仁佢哋唔駛報價?報價又係咪價低者得?又或者有其他標準?林卓廷同何俊仁間律師事務所之間有冇委托書,會唔會公開合約?如果將呢個Job直接判畀何俊仁佢哋,係咪即係「明刀明槍」玩利益輸送呢?

不能隨便拿市民錢益自己友

何俊仁、林卓廷和吳思諾等人,一再話從「公眾領域」得到「證據」顯示梁振英可能有貪腐,但睇埋梁振英最新一份聲明,查實喺公眾領域嘅好多資料都可以證明梁振英清白,同時亦可以證明佢完全冇利益衝突,民主黨堅持搞所謂眾籌嚟「做」佢,分明係想踩住佢上位,擺明係騷擾多於一切。

更重要嘅一點,就係林卓廷聲稱自己作為UGL事件嘅投訴人,他又作為前廉署執法人員,一邊到廉署投訴,一邊又自行組織調查行動,他係質疑自己都曾服務過嘅廉政公署?他背後到底有咩動機?如果他真係咁「正義」、「愛抱不平」,點解又唔組織一個「真‧天下為公」行動,眾籌、調查一下「搶」政府人員手機嘅嫌疑犯許智峯呢?

圖片來源:大公報

評論