出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
盲反派九議員考察大灣區 唔搞事真了解無任歡迎
盲反派九議員考察大灣區 唔搞事真了解無任歡迎

粵港澳大灣區規劃籌備工作,基本上已經進入尾聲,唔少傳媒亦已經報道,話大灣區規劃嘅具體措施將會好快出台,香港好應該把握呢個難得機會,融入國家發展大局,等經濟可以持續高速發展,解決社會需要。道理其實好易明,偏偏香港盲反派最喜歡扮唔明,近日香港立法會搞咗個大灣區考察團,當中竟然有九個盲反派議員肯報名返內地考察,囍雨聽到真係乍驚乍喜,只係唔知呢班人係唔係真係做到實事求是、認真考察啫。

盲反派劣行罄竹難書

囍雨之所以對盲反派有疑慮,無非因為呢班人往績太差、搞事紀錄太多。大家記唔記得2014年商討政改期間,時任特首梁振英排除萬難安排咗一場「上海之旅」,等班一向唔返、返唔到內地嘅盲反派議員,可以有機會直接當面同中央官員反映意見。最後效果如何,囍雨亦唔想再多講,當日公民黨等盲反派嘅行為,確實係令人極為不齒,呢個亦係令到囍雨今次心存疑慮嘅原因。

當日,同樣有報名去上海嘅前社民連議員梁國雄,因為隨身帶住大量違禁品而被拘查,佢最終拂袖而去,去到上海大門口都要玩折返;公民                                   黨方面,本來已經答應出席嘅時任黨魁梁家傑「話嫁又唔嫁」,答應咗出席又臨時甩底,睇到呢度已經知道公民黨不安好心。咁入到境嘅其他公民黨議員又點呀?兩位成功連任嘅議員,包括法律界郭榮鏗同新界西郭家麒,去到上海唔跟大隊,擅自走去派政治傳單、博上鏡,剩係睇到呢度,已經知道佢哋無心溝通,純粹係博宣傳同玩政治表態。

公民黨表明會聽立會秘書處安排

嚟到今次大灣區考察,公民黨又嚟料,新任黨魁楊岳橋同郭榮鏗都有報名,佢兩個出發前就講到好平和,話一切會聽從立法會秘書處安排,以平常心對待、又話今次係實務性考察,目的係了解區內經濟、金融服務、高新科技、人工智能等發展。

老老實實,如果公民黨係放低意識形態鬥爭,好好咁去了解大灣區發展對香港有幾重要,繼而積極配合、提出建議,等大灣區可以落實得暢順完善,咁相信大家都會歡迎佢哋多多考察,但若然去到內地又係搞政治宣傳,做埋晒啲刻意挑戰中央政府嘅事,咁就真係多謝晒喇,香港人唔需要你哋用公帑(議員考察當然用公帑)去咁做!

為香港民生經濟 請放棄抽水搞事

盲反派過去成日話,講到民生經濟發展,同中央政府「可以溝通」,今次正正係好好機會展示呢班人到底講唔講口齒,若然有人食言,就足以再次證明,呢班人永遠係「政治為先、民生為後」,將經濟民生發展棄之不顧,下次係唔係仲要投畀呢班人,真係要諗諗囉。

圖片來源:大公報、RTHK