使用社交媒體 小心個人資料被洩
使用社交媒體 小心個人資料被洩

廣男前嗰排留意到一單新聞,話英國科技公司「劍橋分析」攞咗幾千萬個Facebook用戶個人資料之後,用嚟影響選民投票意向,幫特朗普贏美國總統大選。呢單新聞令廣男諗起以前Facebook有段時間,出現大量心理測驗同小遊戲,廠方會要求你授權畀佢取得你嘅個人資料。開頭廣男都無咩所謂,但諗諗下都覺得唔對路,點解會需要學歷、工作、電郵等等唔關事嘅資料呢?

用戶應小心保障自己資料

社交媒體講求方便、互通,但其實越方便就意味住你嘅資料越容人畀人周圍share,好多時大家只係「撳個掣」同意畀人使用你資料,但資料從此就喺他人手上,仲要係唔知幾多人有你資料。所以廣男建議,大家作為一個精明嘅用戶,要授權第三方用你資料嘅時候,真係要睇清楚條款細則、諗清楚係咪有需要畀資料對方!始終畀人拎咗啲資料,就好難知對方會拎嚟點用。

今次「劍橋分析」能夠收集到成五千萬人嘅資料再用嚟助選,你話佢之前花咗幾多工夫收集或者買人哋啲資料呢?分分鐘用啲所謂心理測驗APP、小遊戲,就將大家同埋大家朋友啲資料全部攞晒!

個人資料問題 伸延到政治、選舉

今次事件帶出嚟嘅另一問題,就係喺西方社會嘅民主選舉(其實而家香港都係),好容易畀社交平台所影響,之前無論係美國總統選舉或者英國「脫歐」公投,都疑似有政客利用唔同新聞、資料引導選民,再利用社交媒體影響選民意向。所以,個人資料畀唔適當地收集,已經唔單止係商業、錢銀問題咁簡單,而已經係滲透喺我哋嘅公共生活!

之前有報道話過,喺2016年,美國總統選舉同英國「脫歐」公投,班政客都係利用大量假新聞、假資料呃選民,再利用社交媒體做宣傳工具影響選民投票意向。相信而家唔少政客都好後悔唔及早發現呢個問題,搞到而家要捉朱克伯格出嚟算帳咁款。

講真,啲社交媒體、應用程式點樣收集我哋啲個人資料,我哋真係好難控制,唯一可以做嘅,就係盡量唔好畀資料果啲來歷不明嘅程式。其實,件事搞到咁大,啲社交媒體係咪應該嚟個大革新,自己好、其他三方軟件也好,唔好再亂咁收人哋啲個人資料,如果有人再用呢啲資料謀利,係咪應該要負上法律責任呢?喺未來嘅日子,數據可能仲值錢過石油,如果唔盡早監管,恐怕我哋呢啲地球人嘅私隱就好難有保障喇!

原圖:朱克伯格Facebook專頁

評論