立法會補選戰幔正式拉開，盲反派經過「嚴格」嘅初選後，選出完全冇做地區工作嘅姚松炎出戰九龍西。不過眾所同知，呢位「學者」曾經拒絕／忽略誓言而被DQ，係唔係肯定入到閘選都未知。正因為咁，盲反派亦有兩手準備，一早為姚松炎搵定「替補人選」（下稱Plan B），但最新消息係，本來按機制屬於Plan B嘅民協老將馮檢基，竟然因為自決派施壓而退出。囍雨覺得堅奇怪，明明盲反派設計好晒Plan B制度，乜大家唔係應該跟住制度去做，點解會出現呢次鬧劇呢？唔通盲反派果然係「口中民主，實質獨裁」？

盲反派自己破壞機制

對於呢場大龍鳳，囍雨覺得盲反派各方人馬查實都好有問題，並冇所謂「受害者」。首先，如果尊重初選機制，自決派以至其他盲反派人士，就唔應畀壓力馮檢基，要佢自己放棄做Plan B，如果一早定好咗又唔算數，咁何必要搞初選呢？直接叫代表自決派嘅姚松炎參選就得啦！另一方面，馮檢基亦都唔可以完全話係受害者，如果佢覺得自己係Plan B係理之所在，佢而家退落嚟將個波交畀民主黨或者袁海文，等民主黨又要喺自決派威脅下決定做唔做Plan B，馮檢基自己一樣都係破壞緊機制，而且馮檢基仲要係有負於支持者果隻！

議席不屬於自決派

至於被指係事件始作俑者嘅自決派人士，可能佢哋「以為」游蕙禎被DQ而出席嘅議席係屬於自決派嘅，所以只有自決派可以參選。但係，既然選舉透過選民決定議席誰屬，咁自決派又憑咩覺得個議席一定係屬於佢哋？如果你問囍雨，囍雨就覺得游蕙禎因為自己「玩嘢」而失去議席，議席就應該由當區選民決定呢個議席究竟畀邊個，唔好話自決派以至盲反派，就算個議席由建制派勝出，一樣可以接受，因為呢個結果始終都係選民決定。

自決派、盲反派嘅邏輯，就係覺得議席係屬於佢哋嘅，甚至有自決派認為人選一定要係自決派；囍雨覺得呢種霸道作風，一啲都唔符合佢哋統稱為「民主派」嘅身份，一班民主派唔係由初選或者選民決定邊個選、選個贏，而係想自己「圍威喂」話事就算，根本就唔民主，甚至可以話係獨斷！今次自決派成功DQ馮檢基，囍雨喺度諗，就算畀班自決派代表成功選入議會，佢哋最後又會唔會因為「玩嘢」或者宣揚「港獨」，最後DQ番自己呢？大家一邊食花生、一邊等睇戲啦！

原圖：takungpao