本身係香港理工大學專任導師嘅立法會議員鄭松泰，早前因為侮辱國旗同區旗罪成，及後理大對佢進行紀律聆訊，決定等佢六月約滿後唔再續約。明明都唔算係乜嘢懲罰，鄭松泰竟然即時走出嚟話「政治打壓」，理大亦有學生聲援佢喺校內貼大字報。理大校方近日喺民主牆張貼聲明，講清楚點解唔同鄭松泰續約，有媒體將聲明形容為鄭松泰「七宗罪」，包括行為嚴重、畀法庭定罪同埋工作性質問題等等；查實，一個犯咗刑事罪行、自己亦已經賠錢認罪嘅人，學校根據既有程序處分佢，究竟有咩問題？最嚴重嘅係，呢種人令人好擔心會向學生灌輸違法或者「勇武抗爭」嘅不良訊息囉！

工作性質特殊？會否向學生「洗腦」？

對於犯左法嘅教師，畀佢哋繼續教學生本身就好有問題，呢個簡單道理相信大家都會明白。囍雨嘗試睇真啲件事，或者大家冇留意，鄭松泰作為一個讀社會學嘅博士，佢喺理大教學範疇包括「香港社會」、「當代中國社會與流行文化」、「社會學概論」以及「當代中國的數碼文化」等科目。一個連國家、特區都唔尊重嘅人去教「中國」？大家預見到啲咩呢？

其實，如果大家試下搵啲讀社會科學或者教社會科學嘅人傾計，佢哋十居其九都有一定政治立場，好多仲係要一邊同你傾計，一邊向你灌輸政治意識果隻；我唔敢講鄭松泰會唔會咁做，只不過佢對中國有咁強烈嘅仇恨，甚至曾經帶隊行私刑、暴力驅趕水貨客，咁「強烈」甚至可以話係偏激嘅政治立場，佢教社會學嘅時候，唔知又做唔做到多元分析呢？

講真吖，連鄭松泰連「倒插國旗」呢啲「小學雞」挑釁性又高嘅事都做得出，佢喺課堂上教授關於中國嘅內容時，佢會講啲咩，真係不敢想像。所以呢，理大其中一個唔同鄭松泰續約嘅原因係基於佢「工作性質」，雖然講得好含蓄，但明顯係因為佢嘅犯罪性質惡劣啦！！

理大作出既正確又艱難的決定

理大決定唔同鄭松泰續約，其實係既正確又艱難嘅決定，因為喺咁敏感嘅時候，理大要作出呢個決定真係一啲都唔容易。不過，囍雨諗深一層，其實合約制老師不獲續約係好正常嘅事，理大又冇即時終止鄭松泰合約，都唔算係咩懲罰啫，到底鄭松泰嘈喧巴閉做乜？講明合約制，幾時講過一定可以續約？連懲罰都講唔上，好心鄭松泰就疊埋心水做政客，唔好誤人子弟啦。 

原圖：takungpao